లాక్డౌన్తో బోధనా కార్యక్రమాలు పూర్తిగా ఆన్లైన్లోకి వెళ్తోన్న క్రమంలో.. విద్యార్థులు డిజిటల్ ప్రపంచానికి చేరువవుతున్నారు. ఇటీవల బయటపడిన 'బోయిస్ లాకర్ రూమ్' గ్రూప్ కేసు వల్ల ఆన్లైన్ బెదిరింపుల ఆందోళనలూ పెరిగాయి. ఈ నేపథ్యంలో ఆన్లైన్ ప్రపంచంలో యువత తమ భద్రతను నిర్ధరించుకోవటానికి పలు మార్గదర్శకాలను విడుదల చేసింది సెంట్రల్ బోర్డ్ ఆఫ్ సెకండరీ ఎడ్యుకేషన్ (సీబీఎస్ఈ).
ద్వేషపూరిత అశ్లీలత (రివేంజ్ పోర్నోగ్రఫీ), ఆన్లైన్ స్నేహాల్లో పరిమితులు విధించుకోవటం, స్నేహితులను అంచనా వేయటం, సమస్యలు ఎదుర్కొన్నప్పుడు పెద్దలకు తెలపటం వంటివి సీబీఎస్ఈ విడుదల చేసిన పాఠాల్లోని ముఖ్యమైన అంశాలు.
9-12వ తరగతుల విద్యార్థుల కోసం సైబర్ భద్రత హ్యాండ్బుక్ను విడుదల చేసింది సీబీఎస్ఈ. ఇందులో విద్యార్థులతో పాటు తల్లిదండ్రులకు సైబర్ నేరాల విషయంలో ఏమి చేయాలి? ఏమి చేయకూడదు అనేది ప్రస్తావించింది.
"ఆన్లైన్ స్నేహాలతో పాటు నిజ జీవితంలోని స్నేహితులతో ఆన్లైన్లో సంభాషించే అంశంపై విద్యార్థులు పరిమితులు విధించుకోవాలి. రాతపూర్వక సమాచారం, ఫొటోలు, వీడియోలను పంచుకునే విషయంలోనూ జాగ్రత్త అవసరం. ఆన్లైన్లో ఉన్నప్పుడు ఎవరు చూస్తున్నారో నియంత్రించలేకపోవటం, నమ్మకాన్ని దుర్వినియోగం చేయటం, ప్రతిష్టకు భంగం కలిగించటం వంటివి జరుగుతాయని గుర్తుంచుకోవాలి. యుక్తవయస్సు వారు లింగ సంబంధాలను అర్థం చేసుకోవాలి. బాలికలు తమతో సమానమనే విషయాన్ని బాలురు తెలుసుకొని గౌరవించుకోవాలి.
సంబంధాలలో అంగీకారం అనేది ఒక ముఖ్యమైన భాగం. విశ్వాసంతో పంచుకున్న చిత్రాలు, వీడియోలు, ఇతర అంశాలను అవతలి వ్యక్తి అనుమతి లేకుండా సామాజిక మాధ్యమాల్లో పంచుకోకూడదు. ఆ వ్యక్తి తమతో రిలేషన్షిప్ కొనసాగించాలనుకోకపోవచ్చు. ఎదుటి వ్యక్తి భావాలను గౌరవించాలి. స్నేహితుల నుంచి తిరస్కరణను ఎదుర్కోవటం యువత నేర్చుకోవాలి."
– బోర్డు సీనియర్ అధికారి.
పిల్లలను శక్తిమంతులుగా తీర్చిదిద్దాలి..
ఇతరులు మన సమాచారాన్ని ఎలా సేకరిస్తారు? ఎలా ఉపయోగించుకుంటారో వారికి తెలియజేయాలని తల్లిదండ్రులకు సూచించింది బోర్డు.
" ప్రస్తుతం భారత్లో డిజిటల్ విభాగంలో కనీస వయస్సు అనేదు లేదు. ఆఫ్లైన్లో శారీరక, లైంగిక విషయాలను పంచుకునేందుకు ఇబ్బంది పడే వ్యక్తులు ఉంటే.. వారు ఒక్కోసారి ఆన్లైన్లో వాటి కోసం వెతకొచ్చు. అలాంటి వారికి హాని చేసే ఉద్దేశంతో కొందరు సైబర్ నేరగాళ్లు ఫేక్ అకౌంట్లు రూపొందించి స్నేహం చేస్తారు.
స్నేహితులుగా మారిన తక్కువ సమయంలోనే తమ గురించి ఆన్లైన్ స్నేహితులు ఎక్కువగా పొగిడినట్లు కనిపిస్తే వారిపట్ల జాగ్రత్తగా ఉండాలి. లైంగికంగా అసభ్యకరమైన ఫొటోలు, వీడియోలను పంపాలని అడిగే వారితో మాట్లాడకూడదు. వ్యక్తిగతంగా కలవాలని అడిగేవారి ఫ్రెండ్ రిక్వెస్ట్ను ఎప్పుడూ అంగీకరించవద్దు. మీరు అసభ్యకరమైన చిత్రాలు అలాంటి వారితో పంచుకుంటే వారు వాటిని ఇతరులతో పంచుకోవటం, సామాజిక మాధ్యమాల్లో పోస్ట్ చేసే అవకాశం ఉంది. అంతే కాదు మిమ్మల్ని బ్లాక్ మెయిల్ చేయొచ్చు."
- సీబీఎస్ఈ హ్యాండ్ బుక్
ద్వేషపూరిత అశ్లీలత ముప్పుపై హెచ్చరిక..
" 14-18 ఏళ్ల వయస్సు మధ్య ఉన్న యువత ఎక్కువగా ద్వేషపూరిత అశ్లీలతకు బాధితులుగా మారుతున్నారు. ఇది ఆందోళన కలిగించే విషయం. కొందరు యువత స్నేహం చేసి తెగదెంపులు చేసుకున్న క్రమంలో.. సామాజిక మాధ్యమాల్లో తమ అసభ్యకర ఫోటోలను గుర్తించిన సందర్భాలు ఉన్నాయి. అలాంటి చిత్రాలు వైరల్గా మారితే తోటి స్నేహితులను వేధించటం, అవమానించటం చేస్తారు. చివరికి ఒంటరిగా మిగిలిపోతారు. ఆన్లైన్ సంబంధాలు ప్రమాదకరమని గుర్తించిన యువతి తన స్నేహితులతో మాట్లాడటం మానేసిన క్రమంలో.. ఆ యువతి అంటే అసూయపడే క్లాస్మెట్, మాజీ ప్రియుడు లేదా ఇతరులు తనను లక్ష్యంగా చేసుకోవచ్చు" అని పేర్కొంది సీబీఎస్ఈ బోర్డు.
బోయిస్ లాకర్ రూమ్..
కొద్ది రోజుల క్రితం అసభ్యకర సంభాషణలు, ఫొటోలు, వీడియోలను పంచుకునేందుకు ఇన్స్టాగ్రామ్లో బోయిస్ లాకర్ రూమ్.. అనే గ్రూప్ రూపొందించినట్లు వెలుగులోకి వచ్చింది. ఆ ఘటనతో ఆన్లైన్ స్నేహాలపై విమర్శలు వెల్లువెత్తాయి. ఈ గ్రూప్లోని కొందరి మధ్య జరిగిన అసభ్యకరమైన సంభాషణలకు చెందిన స్క్రీన్ షాట్లను పోస్ట్ చేశారు. అందులో కొంత మంది దిల్లీలోని ప్రముఖ పాఠశాలకు చెందిన విద్యార్థులు ఉన్నారు. వారి వయస్సు కేవలం 13 ఏళ్లే. బాలికల ఫొటోలతో పాటు వారు చూసిన వాటి గురించి అసభ్యంగా మాట్లాడుకోవటం చేశారు.
బోయిస్ లాకర్ రూమ్ కేసులో దర్యాప్తు చేస్తున్న క్రమంలో స్నాప్షాట్లో జరిగిన ఓ సంభాషణపై పోలీసులకు విస్తుపోయే నిజాలు తెలిశాయి. ఓ బాలుడి గురించి తెలుసుకునేందుకు ఓ అమ్మాయి.. అబ్బాయిలా మాట్లాడుతూ లైంగిక దాడికి ప్రణాళిక వేసినట్లు గుర్తించారు.
