ఫోన్ ట్యాపింగ్ కేసులో ఛత్తీస్గఢ్ ప్రభుత్వంపై ఆగ్రహం వ్యక్తం చేసింది సుప్రీంకోర్టు. సీనియర్ ఐపీఎస్ అధికారి, అతని కుటుంబసభ్యుల ఫోన్లను ట్యాప్ చేయటాన్ని తప్పుబట్టింది. ఎవరికీ ఎలాంటి వ్యక్తిగత గోప్యత లేకుండా చేశారని వ్యాఖ్యానించింది.
ఈ కేసును విచారించిన సుప్రీం న్యాయమూర్తులు జస్టిస్ అరుణ్ మిశ్రా, జస్టిస్ ఇందిరా బెనర్జీ ధర్మాసనం.. ఈ విధంగా వ్యక్తిగత గోప్యతకు భంగం కలిగించే హక్కు మీకు ఉందా? అని ప్రభుత్వాన్ని ప్రశ్నించింది. ఫోన్ ట్యాపింగ్ చేయటానికి ఎవరు ఆదేశించారు? వాటికి కారణాలను అఫిడవిట్ రూపంలో సమర్పించాలని ప్రభుత్వాన్ని సుప్రీం కోర్టు ఆదేశించింది.
సీఎం ప్రస్తావన రావద్దు..
ఐపీఎస్ అధికారి తరఫు న్యాయవాది మహేశ్ జెఠ్మలానీకి ఊరట కల్పించింది సుప్రీం. ఆయనపై దాఖలైన ఎఫ్ఐఆర్.. విచారణపై న్యాయస్థానం స్టే విధించింది. అంతేకాకుండా ఛత్తీస్గఢ్ సీఎం ప్రస్తావన తీసుకొచ్చి ఈ కేసును రాజకీయం చేయొద్దని జెఠ్మలానీకి సూచించింది. పిటిషన్లలో ముఖ్యమంత్రి పేరును తొలగించాలని స్పష్టం చేసింది.
ఇదీ చూడండి: చుక్క నీటి కోసం.. నగరాలకు కష్టకాలం!
