శబరిమల ఆలయంలోకి భక్తులకు నో ఎంట్రీ

మార్చి 29నుంచి జరిగే శబరిమల ఆలయ వార్షికోత్సవానికి భక్తులకు అనుమతి లేదని కేరళ ప్రభుత్వం ప్రకటించింది. ఈ నిషేధం 10 రోజుల పాటు కొనసాగుతుందని స్పష్టం చేసింది. అదేవిధంగా త్రిశూర్​ నగరంలోని ప్రముఖ కృష్ణాలయం దర్శనాన్ని కూడా తాత్కాలికంగా నిలిపివేస్తున్నట్లు అధికారులు తెలిపారు.

కేరళలో కరోనా వైరస్​ వేగంగా విస్తరిస్తోంది. ఈ నేపథ్యంలో ఇప్పటికే పలు ఆంక్షలు విధించింది ఆ రాష్ట్ర ప్రభుత్వం. తాజాగా మార్చి 29 నుంచి జరిగే శబరిమల ఆలయ వార్షికోత్సవ వేడుకలకు భక్తులను అనుమతించబోమని స్పష్టం చేసింది.

దేశంలో కరోనా వైరస్​ వేగంగా వ్యాప్తి చెందుతున్న తరుణంలో జిల్లా పాలనాధికారి, జిల్లా విపత్తు నిర్వహణ విభాగ ఛైర్మన్​తో చర్చించి శబరిమలలో భక్తుల ప్రవేశంపై నిషేధాజ్ఞలు విధిస్తున్నట్లు ఆలయ బోర్డు వెల్లడించింది.

మార్చి 28 నుంచి ఏప్రిల్​ 7 వరకు 10 రోజుల పాటు శబరిమల వార్షిక వేడుకలను నిర్వహించనున్నారు ఆలయ అధికారులు.

కృష్ణా ఆలయం కూడా..

త్రిశూర్​ నగరంలోని ప్రముఖ కృష్ణాలయంలోకి భక్తుల ప్రవేశాన్ని తాత్కాలికంగా నిలిపి వేస్తున్నట్లు అధికారులు తెలిపారు. అయితే ఎప్పటిలాగే పూజా కార్యక్రమాలు యథావిధిగా జరుగుతాయని తెలిపారు.

కాశీ ఆలయం సైతం..

ఉత్తర్​ప్రదేశ్​లో ప్రముఖ శైవ క్షేత్రమైన కాశీ ఆలయాన్ని కూడా మూసి వేస్తున్నట్లు ఆ రాష్ట్ర అధికారులు ప్రకటించారు.

ఇదీ చూడండి:బాలీవుడ్​ గాయనితో పార్లమెంట్​కు కరోనా సెగ