అమ్మతనానికే మచ్చ తెచ్చే సంఘటన కర్ణాటక బెల్గాం జిల్లాలో జరిగింది. తన పొత్తిళ్లల్లో సురక్షితంగా ఉండాల్సిన నవజాత శిశువును రోడ్డు పక్కన కొత్తగా ఏర్పాటు చేస్తున్న నీటి పైపుల్లో పడేసి వెళ్లింది ఓ కర్కశ తల్లి. అది గ్రామంలోని ప్రాథమిక ఆరోగ్య కేంద్రానికి సమీపంలో జరగటం గమనార్హం.
చచాడీ గ్రామంలోని ప్రాథమిక ఆరోగ్య కేంద్రం సమీపంలో ఓ శిశువు అరుపులు విని ఆశా కార్యకర్తలు, అంగన్వాడీ సిబ్బంది వెతికారు. రోడ్డు పక్కన కొత్తగా నిర్మిస్తున్న మంచి నీటి పైపుల్లో అప్పుడే పుట్టిన శిశువును గుర్తించి కాపాడారు.
ప్రాథమిక ఆరోగ్య కేంద్రంలో చిన్నారికి ఆరోగ్య పరీక్షలు నిర్వహించారు వైద్యులు. ప్రస్తుతం గ్రామస్థులే.. ఆ శిశువు బాధ్యతలను చూస్తున్నారు.
ముర్గోదా ఎస్సై సంఘటనా స్థలానికి చేరుకుని తనిఖీ చేశారు. శిశువును ఇక్కడ పడేసింది ఎవరు, కారణాలేంటనే అంశంలో దర్యాప్తు చేపట్టినట్లు చెప్పారు.
ఇదీ చూడండి: ఆ మంటతో తంటాలుపడక ముందే జాగ్రత్తపడదాం!
