కాంగ్రెస్ తరఫున సల్మాన్​ ఖాన్?

బాలీవుడ్​ సూపర్​స్టార్ సల్మాన్​ ఖాన్​తో మధ్యప్రదేశ్​లోని ఇండోర్​లో ప్రచారం చేయించాలని కాంగ్రెస్ పార్టీ భావిస్తోంది. ఈ మేరకు సల్మాన్​తో సంప్రదింపులు జరిపినట్లు కాంగ్రెస్​ నేత తెలిపారు.

మధ్యప్రదేశ్​లోని ఇండోర్​ లోక్​సభ స్థానంలో కాంగ్రెస్​ పార్టీ తరఫున బాలీవుడ్​ కండల వీరుడు సల్మాన్ ఖాన్​తో ప్రచారం చేయించేందుకు ప్రయత్నాలు జరగుతున్నాయి. ఈ విషయాన్ని మధ్యప్రదేశ్​ కాంగ్రెస్​ అధికార ప్రతినిధి పంకజ్​ చతుర్వేది తెలిపారు. సల్మాన్​ తమ వినతికి సానుకూలంగా స్పందిస్తారని ఆశాభావం వ్యక్తం చేశారు.

'సల్మాన్​ ఖాన్​ ఇండోర్​లోనే జన్మించారు. అతని బాల్యమంతా ఇక్కడే గడిచింది. ఆయన తాతగారు ఇక్కడే సీనియర్​ పోలీసు అధికారిగా విధులు నిర్వర్తించారు. సల్మాన్ ప్రచారం చేస్తే ఇండోర్​లో కాంగ్రెస్​ పార్టీ రూపు రేఖలు పూర్తిగా మారిపోతాయి'

- పంకజ్​ చతుర్వేది, మధ్యప్రదేశ్​ కాంగ్రెస్​ అధికార ప్రతినిధి

అయితే... ఈ విషయంపై స్పందించేందుకు సల్మాన్​ ఖాన్​ ప్రతినిధి నిరాకరించారు.

భాజపా కంచుకోట

మధ్యప్రదేశ్​లో అతిపెద్ద పట్ణణమైన ఇండోర్​​ భాజపా కంచుకోట. 1989లో జరిగిన ఎన్నికల్లో అప్పటి సీనియర్ కాంగ్రెస్ నేత, మాజీ సీఎం ప్రకాశ్ చంద్రపై భాజపా నేత సుమిత్రా మహాజన్ ఘన విజయం సాధించారు. అప్పటి నుంచి ఈ స్థానంలో భాజపా తరఫున ఆమె ప్రాతినిథ్యం వహిస్తున్నారు. ఎనిమిది సార్లు ఎంపీగా గెలుపొందిన సుమిత్రా మహాజన్​ ప్రస్తుతం లోక్​సభ స్పీకర్​గా వ్యహరిస్తున్నారు.

గతంలో ఫలించని సల్మాన్ ప్రచారం

2009లో ఇండోర్ మేయర్ ఎన్నికల్లో కాంగ్రెస్​ అభ్యర్థి పంకజ్ సంఘవికి మద్దతుగా సల్మాన్ రోడ్​ షో నిర్వహించారు. ఫలితంగా కాంగ్రెస్​కు చేదు అనుభవమే మిగిలింది. భాజపా అభ్యర్థే గెలుపొందారు.