దేశ నూతన పార్లమెంట్ భవనానికి ప్రధానమంత్రి నరేంద్రమోదీ డిసెంబర్ ప్రథమార్ధంలో శంకుస్థాపన చేసే అవకాశం ఉన్నట్లు అధికారులు తెలిపారు. నిర్మాణ పనులు జరగనున్న నేపథ్యంలో పార్లమెంట్ ఆవరణలోని మహాత్మా గాంధీ, బీఆర్ అంబేద్కర్ సహా మొత్తం ఐదు విగ్రహాలను తాత్కాలికంగా అక్కడి నుంచి తరలించనున్నట్లు చెప్పారు. నూతన భవనం పూర్తయ్యాక.. ఈ విగ్రహాలను తిరిగి ప్రతిష్ఠించనున్నట్లు స్పష్టం చేశారు.
16 అడుగుల ఎత్తైన గాంధీ విగ్రహం ప్రస్తుత పార్లమెంట్ ఒకటో గేట్ ఎదురుగా ఉంది. పార్లమెంట్ సభ్యులు మీడియాతో మాట్లాడేందుకు, నిరసన ప్రదర్శనలు నిర్వహించేందుకు ఈ ప్రదేశమే కేంద్ర బిందువుగా ఉంది.
తొలుత.. డిసెంబర్ 10న శంకుస్థాపన తేదీగా ప్రతిపాదించారు అధికారులు. అయితే ప్రధాని అందుబాటులో ఉండే సమయాన్ని బట్టి తుది తేదీని ఖరారు చేయనున్నారు.
సెంట్రల్ విస్తాలో భాగంగా పార్లమెంట్ భవనం, సెంట్రల్ సెక్రెటేరియట్ను నిర్మించనున్నారు. రాష్ట్రపతి భవన్ నుంచి ఇండియా గేట్ వరకు ఉన్న మూడు కి.మీ మార్గంలో ప్రభుత్వ భవనాలను ఏర్పాటు చేయనున్నారు. సెంట్రల్ విస్తా రీడెవలప్మెంట్ ప్రాజెక్టులో భాగంగా ప్రస్తుత పార్లమెంట్కు సమీపంలోనే కొత్త భవాన్ని నిర్మించనున్నారు. 21 నెలల్లో ప్రాజెక్టును పూర్తి చేయాలని లక్ష్యంగా పెట్టుకున్నారు.
ఇవీ చదవండి-
