సార్వత్రిక ఎన్నికల్లో అఖండ విజయం సొంతం చేసుకుంది భాజపా. మోదీ మరోసారి దేశ ప్రధానిగా ప్రమాణ స్వీకారం చేయనున్నారు. ఈ కార్యక్రమానికి హాజరవ్వాలని బిమ్స్టెక్ (బీఐఎంఎస్టీఈసీ) దేశాధినేతలకు ఆహ్వానం పంపారు విదేశాంగశాఖ అధికారులు.
ఈ మేరకు బంగ్లాదేశ్, భూటాన్, మయన్మార్, నేపాల్, శ్రీలంక, థాయ్లాండ్ దేశాధినేతలకు ఆహ్వానం అందించారు. వీరితో పాటు మారిషెస్ ప్రధాని, కిర్గీజ్ రిపబ్లిక్ అధ్యక్షుడిని ఆహ్వానించినట్టు తెలిపారు. వీరందరూ ప్రమాణ స్వీకారోత్సవానికి హాజరయ్యే అవకాశాలున్నాయని అధికారులు ఆశాభావం వ్యక్తం చేశారు. అయితే, కార్యక్రమానికి బంగ్లాదేశ్ ప్రధాని షేక్ హసీనా హాజరయ్యే అవకాశం లేదు. ఆ సమయంలో ఆమె విదేశీ పర్యటనలో ఉండనున్నారు. పాకిస్థాన్ ప్రధాని ఇమ్రాన్ ఖాన్కు ఆహ్వానంపై స్పష్టత ఇవ్వలేదు విదేశాంగ శాఖ. నరేంద్రమోదీ దేశ ప్రధానిగా రెండోసారి ఈ నెల 30న ప్రమాణ స్వీకారం చేయనున్నారు.
2014 తరహాలోనే..
2014లో తొలిసారి దేశ ప్రధానిగా ప్రమాణస్వీకారం చేశారు మోదీ. ఈ కార్యక్రమానికి అప్పటి పాకిస్థాన్ ప్రధాని నవాజ్ షరీఫ్తో పాటు 'సార్క్' దేశాధినేతలు హాజరయ్యారు. గతంలో మాదిరిగానే తన ప్రమాణ స్వీకారాన్ని విదేశీ నేతల సమక్షంలో జరుపుకోవాలని మోదీ భావిస్తున్నారు. అందుకే, ఈ సారి బిమ్స్టెక్ దేశాధినేతలతో పాటు మరికొంతమంది విదేశీ నేతలకు ఆహ్వానం పంపారు.
ఇదీ చూడండి : 'అయోధ్యలో రామమందిర నిర్మాణం జరుగుతుంది'
