జమ్ముకశ్మీర్లో ఉగ్రవాదులు మరోమారు రెచ్చిపోయారు. పుల్వామా జిల్లాలో పోలీసుల్ని లక్ష్యంగా చేసుకుని దాడికి తెగబడ్డారు. ఈ ఘటనలో ఒక పోలీసు ప్రాణాలు కోల్పోయారు. మరొకరు గాయపడ్డారు.
పెర్చు వంతెన సమీపంలో ఈ ఘటన జరిగింది. సీఆర్పీఎఫ్, జమ్ము కశ్మీర్ పోలీసులు సంయుక్తంగా పెట్రోలింగ్ చేస్తున్న సమయంలో ముష్కరులు ఒక్కసారిగా దాడికి పాల్పడ్డారు. ఉగ్రవాదుల దాడిలో ఇండియా రిజర్వ్ పోలీసు 10వ బెటాలియన్కు చెందిన అనుజ్ సింగ్, మహ్మద్ ఇబ్రహీం ఇద్దరూ తీవ్రంగా గాయపడ్డారు. వీరిలో అనుజ్ సింగ్ ప్రాణాలు కోల్పోయారని అధికారులు తెలిపారు.
సమాచారం అందుకున్న అధికారులు అదనపు బలగాల్ని ఘటనా స్థలానికి తరలించారు. ముష్కరుల కోసం విస్తృతంగా గాలిస్తున్నారు.
బుధవారం జమ్ముకశ్మీర్ గండేర్బల్ జిల్లా పాండచ్ ప్రాంతంలో గస్తీ విధులు నిర్వర్తిస్తున్న బీఎస్ఎఫ్ బృందాన్ని లక్ష్యంగా చేసుకుని ముష్కరులు దాడికి తెగబడ్డారు. ఈ దాడిలో ఇద్దరు జవాన్లు అమరులయ్యారు.
