లాక్డౌన్ కారణంగా దేశవ్యాప్తంగా నిలిచిపోయిన మెట్రో రైళ్లు ఇవాళ పునఃప్రారంభమయ్యాయి. అన్‌లాక్-4లో భాగంగా మెట్రోరైళ్ల నడిపేందుకు కేంద్రం అనుమతివ్వగా.. మహారాష్ట్ర మినహా మిగిలిన ప్రాంతాల్లో సేవలను పునరుద్ధరించారు.
కరోనా నేపథ్యంలో మూతపడిన దిల్లీ మెట్రో.. 169 రోజుల సుదీర్ఘ విరామం తర్వాత సోమవారం ఉదయం 7 గంటలకు మళ్లీ కూతపెట్టింది.
అయితే, మూడు దశల్లో సేవలను పునరుద్ధరించనున్నట్లు దిల్లీ మెట్రో రైల్ కార్పొరేషన్ వెల్లడించింది. మొదటి దశలో భాగంగా ప్రారంభమైన యెల్లో లైన్ (సమయ్పుర్ బడ్లీ- హుడా సిటీ సెంటర్), గురుగ్రామ్లోని ర్యాపిడ్ లైన్లలో పరిమిత సంఖ్యలో సేవలను అందించనున్నట్లు స్పష్టం చేసింది.
ఇందులో భాగంగా ఉదయం 7 నుంచి 11 గంటల వరకు, తర్వాత సాయంత్రం 4 నుంచి రాత్రి 8 గంటల వరకు రెండు బ్యాచుల్లో రైళ్లను నడుపుతారు. అయితే, అత్యవసర పనులకే మెట్రో వినియోగించుకోవాలని ప్రజలను డీఎంఆర్సీ కోరింది. మెట్రో రైలు సేవలు ప్రారంభం కావటం పట్ల ప్రయాణికులు సంతోషం వ్యక్తం చేస్తున్నారు.
కరోనా మహమ్మారి విజృంభణతో దేశ రాజధానిలో మార్చి 22 నుంచి మెట్రో సేవలను రద్దు చేశారు.
ఇదీ చూడండి: మెట్రో రైల్ సేవలకు మార్గదర్శకాలు ఖరారు!
