తూర్పు అసోంలోని ఓ చమురు బావిలో మంటలు చెలరేగిన ఘటనలో ఇద్దరు మృతిచెందారు. వీరి మృతదేహాలను ఎన్డీఆర్ఎఫ్ బృందం వెలికితీసింది.
అసోం టిన్సుకియా జిల్లాలోని భాగ్జన్ వద్ద ఉన్న ఆయిల్ ఇండియా లిమిటెట్ చమురు బావిలో మంగళవారం చెలరేగిన మంటలు ఇంకా అదుపులోకి రాలేదు. అగ్నికీలలు భారీ ఎత్తున ఎగిసిపడుతున్నాయి. పరిస్థితిని అదుపుచేసేందుకు ఎన్డీఆర్ఎఫ్ బృందంతో పాటు అగ్నిమాపక సిబ్బంది తీవ్రంగా శ్రమిస్తున్నారు.
చమురు బావిలో అదుపులోకి రాని మంటలు
స్థానికులను ఇప్పటికే సురక్షిత ప్రాంతాలకు తరలించారు. ఇప్పటివరకు 50 నివాసాలు అగ్నికి ఆహుతయ్యాయి. మే 27 నుంచి గ్యాస్ లీక్ అవుతోందని, ఇప్పటికే అనేక చేపలు, పక్షులు, జంతువులు మరణించాయని స్థానికులు తెలిపారు.
మరోవైపు రాష్ట్ర పారిశ్రామిక మంత్రి చంద్రమోహన్ పటోవరి బుధవారం ఘటనాస్థలాన్ని పరిశీలించనున్నారు.
