'శివసేనతో పొత్తు ప్రసక్తే లేదు.. విపక్షంలోనే ఉంటాం'

అధికారం కోసం శివసేనతో చేతులు కలిపే ప్రసక్తే లేదని తేల్చిచెప్పింది కాంగ్రెస్​- ఎన్​సీపీ కూటమి. ప్రజలు తమను విపక్షంలో కూర్చోవాలని ఆదేశించారని... తాము అదే చేస్తామని కూటమి నేతలు స్పష్టం చేశారు. ఈ నిర్ణయం వల్ల శివసేనతో కలిసి భాజపా ప్రభుత్వం ఏర్పాటు చేయడానికి దాదాపు అన్ని మార్గాలు సుగమం అయినట్టే.

మహారాష్ట్రలో భాజపాను అధికారానికి దూరం చేయాలనే ఉద్దేశంతో.. కాంగ్రెస్​- నేషనలిస్ట్​ కాంగ్రెస్​ పార్టీ(ఎన్​సీపీ) శివసేనతో చేతులు కలుపుతాయన్న ఊహాగానాలు జోరందుకున్నాయి. వీటిపై స్పందించిన మహారాష్ట్ర కాంగ్రెస్​ అధ్యక్షుడు బాలాసాహెబ్​ థోరట్​.. శివసేనతో పొత్తు కుదుర్చుకునేది లేదని తేల్చిచెప్పారు.

"శివసేన నేతృత్వంలో ప్రభుత్వాన్ని ఏర్పాటు చేయాలన్న వ్యూహం మాకు లేదు. శివసేనతో కాంగ్రెస్​ పొత్తు అనే అంశమే తెరపైకి రాకూడదు. సేన మా వద్దకు వస్తే.. మా హైకమాండ్​తో చర్చిస్తాం. వారిదే తుది నిర్ణయం."

-- బాలాసాహెబ్​​, మహారాష్ట్ర పీసీసీ చీఫ్​

శివసేనతో చేతులు కలిపే అంశాన్ని ఎన్​సీపీ అధ్యక్షుడు శరద్​ పవార్​ కొట్టిపారేశారు. భవిష్యత్తు కార్యచరణపై కాంగ్రెస్​తో చర్చించి నిర్ణయం తీసుకుంటామన్నారు.

"ప్రజలు మమ్మల్ని విపక్షంలో కూర్చోమన్నారు. మేము ప్రజల ఆదేశాలను అంగీకరిస్తాం. అధికారం చేపట్టాలన్న ఆలోచనే మాకు లేదు."

---- శరద్​ పవార్​, ఎన్​సీపీ అధ్యక్షుడు.

ఇక శివసేన మైత్రితో భాజపా ప్రభుత్వాన్ని ఏర్పాటు చేయడానికి అన్ని మార్గాలు సుగమమయ్యాయి.

288 అసెంబ్లీ స్థానాలున్న మహారాష్ట్ర ఎన్నికల ఫలితాలు గురువారం విడుదలయ్యాయి. భాజపా-105, శివసేన- 56 స్థానాల్లో గెలుపొందాయి. కాంగ్రెస్​- 44, ఎన్​సీపీ- 54 సీట్లు దక్కించుకున్నాయి. ప్రభుత్వ స్థాపనకు కావాల్సిన మెజారిటీ 145 సీట్లు. శివసేన మద్దతు లేకపోతే కాషాయ దళం అధికారం దక్కించుకునే అవకాశం లేదు.