తూర్పు లద్దాఖ్లో సరిహద్దుల వెంబడి నెలకొన్న ఉద్రిక్తతలు తగ్గించడమే లక్ష్యంగా.. భారత్-చైనా మధ్య సోమవారం ఆరోసారి కమాండర్ స్థాయిలో చర్చలు జరగునున్నాయి. ఎల్‌ఏసీ వెంబడి చైనా పరిధిలో ఉన్న మోల్డోలో వివిధ అంశాలపై చర్చించనున్నారు. తొలిసారిగా.. విదేశాంగ మంత్రిత్వ శాఖ సంయుక్త కార్యదర్శి స్థాయి అధికారి ఈ సమావేశంలో పాల్గొననున్నట్లు సమాచారం.
కార్ప్స్ కమాండర్ స్థాయిలో జరగునున్న ఈ భేటీలో ఫింగర్ ప్రాంతంలో బలగాల ఉపసంహరణపైనే ప్రధానంగా దృష్టి సారించనున్నట్లు భారత సైనిక వర్గాలు వెల్లడించాయి. ఉద్రిక్తతలు పెరిగే చర్యలను నివారించడం, సరిహద్దుల్లో శాంతి స్థాపన కోసం తూర్పు లద్దాఖ్లో ఎల్‌ఏసీ వెంబడి బలగాలను సత్వరం వెనక్కి తీసుకోనే అంశాలపై ఈ భేటీలో చర్చించనున్నారు.
20 వ్యూహాత్మక పర్వతాల్లో భారత్ ఆధిపత్యం..
ఇరుపక్షాలు మరోసారి చర్చలు జరుపుతున్నప్పటికీ, పాంగాంగ్ సరస్సు సమీపంలో ఉన్న 20కి పైగా వ్యూహాత్మక పర్వతాల్లో తన ఆధిపత్యాన్ని మరింత పెంచుకుంది భారత్. ఈ నేపథ్యంలో ఇటీవల భారత్ వాయసేన అమ్ములపొదిలోకి వచ్చి చేరిన రఫెల్ యుద్ధ విమానాన్ని సరిహద్దులో మోహరించేందుకు ఏర్పాట్లు చేస్తున్నారు. ఎటువంటి పరిస్థితులనైనా ఎదుర్కోవడానికి భారత్ సిద్ధంగా ఉందని హెచ్చరిస్తూనే ఉంది భారత్.
సెప్టెంబర్ 10న మాస్కోలో షాంఘై కోఆపరేషన్ ఆర్గనైజేషన్(ఎస్సీఓ) సదస్సు విరామంలో.. భారత విదేశాంగ మంత్రి జైశంకర్, చైనా ప్రతినిధి వాంగ్ యీ మధ్య జరిగిన భేటీలో సరిహద్దు సమస్యను పరిష్కరించడానికి కీలక ఒప్పందం కుదరటం గమనార్హం.
ఇదీ చూడండి: రాజ్యసభలో విపక్షాల ప్రవర్తన సిగ్గుచేటు: రాజ్నాథ్
