కేరళలో ఓ విచిత్ర సంఘటన జరిగింది. పనసపండు తల మీద పడి గాయాలపాలయ్యాడు ఓ ఆటో డ్రైవర్. చికిత్స కోసం ఆసుపత్రికి వెళ్లగా.. అతడికి కరోనా సోకినట్టు వైద్యులు తెలిపారు. ఆ విషయం తెలుసుకున్న అతడు షాక్కు గురయ్యాడు.
జరిగిందేమిటంటే..?
కన్నూరులోని పరియారం వైద్య కళాశాల అధికారుల కథనం ప్రకారం.. కాసరగోడ్‌ జిల్లాలోని బేలూరుకు చెందిన ఓ ఆటో డ్రైవర్ పనసపండును తెంపబోయాడు. వాటిలో ఒకటి అతని తలపై పడటం వల్ల గాయపడ్డాడు. కాళ్లు, చేతులకు కూడా బాగా దెబ్బలు తగిలాయి. ఆ వ్యక్తికి శస్త్రచికిత్స జరపాలని వైద్యులు నిర్ణయించారు. ప్రస్తుత వైద్య నిబంధనల ప్రకారం, ఇతర పరీక్షలతో పాటు ఆ వ్యక్తికి కరోనా వైరస్ నిర్ధరణ పరీక్షలనూ చేశారు. వెలువడ్డ ఫలితాల్లో అతనికి కరోనా ఉన్నట్టు తేలింది.
వైరస్ ఎలా సోకింది?
ఆటో డ్రైవర్ గతంలో విదేశాలకు వెళ్లిన సందర్భాలు లేవు. ఆయన సంబంధీకుల్లో ఎవరికీ ఇప్పటి వరకు కరోనా సోకలేదు. ఆటోలో ప్రయాణించిన వారి నుంచే ఈ మమ్మారి సోకి ఉంటుందని అధికారులు అనుమానిస్తున్నారు. లేదా గతంలో జిల్లా ఆస్పత్రికి వెళ్లటం వల్ల అక్కడ ఈ మహ్మారి బారిన పడి ఉంటాడని భావిస్తున్నారు. ప్రస్తుతం బాధితుడి కుటుంబ సభ్యులను క్వారంటైన్‌లో ఉంచారు.
ఇదీ చూడండి: క్వారంటైన్ సెంటర్ సాక్షిగా 'కాజల్- ఓంప్రకాశ్'ల కల్యాణం
