ఈమె కర్తార్ కౌర్ సంఘా. వయసు 118 ఏళ్లు. 5 తరాలు చూశారు. ఇంతకుముందెప్పుడూ వ్యాధుల బారిన పడలేదు. ఇటీవల గుండె ప్రతిస్పందన సరిలేక ఆస్పత్రికి తీసుకొచ్చారు కుటుంబసభ్యులు. ఈ వయసులో కర్తార్కు శస్త్రచికిత్స చేశారు వైద్యులు. హృదయ స్పందనలను నియంత్రించే పేస్మేకర్ అమర్చి, ఆమె ప్రాణాలు కాపాడారు. పంజాబ్ లూథియానాలో జరిగిందీ అద్భుతం.
"మా అమ్మకు 118 ఏళ్లు. ఇప్పటివరకు పెద్ద వ్యాధులేమీ రాలేదు. ఆసుపత్రికే రాలేదు. నాకు 90 ఏళ్లు. ఉపాధ్యాయురాలిగా పదవీ విరమణ పొందాను." -- జిబ్రిజిందర్ కౌర్, కర్తార్ కుమార్తె
" ఆమె మా కుటుంబంలో 5 తరాలు చూశారు. ఆమె మాకు చాలా విలువైన మనిషి. అందుకే ఏ రికార్డుల కోసం ఇంతవరకూ ప్రయత్నించలేదు. మాకు అది అవసరం లేదనిపించింది. ఆమెకు మొదటిసారి అనారోగ్యం వచ్చింది. వైద్యులు గుండెలో పేస్మేకర్ అమర్చారు. మాకు చాలా గర్వంగా ఉంది. మేము ఇక్కడికి వచ్చినప్పుడు ఆమె గుండె నిమిషానికి 20 సార్లే కొట్టుకునేది. పేస్మేకర్ అమర్చిన 2 రోజుల తర్వాత సాధారణ స్థితికి వచ్చింది. ఇంటికి వెళ్లేందుకు సిద్ధంగా ఉన్నాం. " -- సిమ్రన్ జీత్ సింగ్ సంఘా,కర్తార్ ముని మనవడు
గిన్నిస్ రికార్డు కోసం దరఖాస్తు చేసినట్టు తెలిపారు కర్తార్కు శస్త్ర చికిత్స చేసిన వైద్యులు.
"118 ఏళ్ల వృద్ధురాలికి ఈ ఆపరేషన్ చేయడం మాకు పెద్ద సవాల్ అనుకున్నాం. ఆమె కుటుంబం మాకు మద్దతిచ్చింది. ఆపరేషన్ చేయకుంటే ఆమెను కొద్ది గంటల్లో కోల్పోవాల్సి వస్తుందని బాధపడ్డారు. శస్త్రచికిత్స తర్వాత అమె చాలా ఆరోగ్యంగా ఉన్నారు. అందరినీ గుర్తుపడుతున్నారు. గత రికార్డు 107 సంవత్సరాలకు ఉంది. మేము ఆ రికార్డును దాటామని విశ్వాసంగా ఉన్నాం. గిన్నిస్ రికార్డు, లిమ్కా బుక్ ఆఫ్ రికార్డుకు దరఖాస్తు చేశాం." - రవీందర్ సింగ్, వైద్యుడు
