ఆధార్ కార్డు మాదిరిగానే రాష్ట్రంలోని రైతులకు 'స్వాభిమాని ఫార్మర్' అనే విశిష్ట గుర్తింపు కార్డు ఇవ్వనుంది కర్ణాటక ప్రభుత్వం. రుణాలు, ప్రభుత్వ పథకాల విషయంలో రైతులకు త్వరితగతిన లబ్ధి చేకూర్చేందుకు ఈ కార్డు ఉపయోగపడుతుందని పేర్కొంది. ఈ మేరకు రాష్ట్ర వ్యవసాయ శాఖ అన్ని ఏర్పాట్లు చేసింది. వ్యవసాయ శాఖ మంత్రి బీసీ పాటిల్ శనివారం.. కొప్పాల్ జిల్లా రైతులకు తొలిసారిగా ఈ కార్డులు అందించనున్నారు.
'స్వాభిమాని ఫార్మర్' కార్డు అంటే?
రైతుల వివరాలను నమోదు చేసేందుకు రాష్ట్ర ప్రభుత్వం ఓ సాఫ్ట్వేర్ను అభివృద్ధి చేసింది. దీనికి 'ఫ్రూట్స్' అనే పేరు పెట్టింది. ఈ సాఫ్ట్వేర్లో వివరాలు నమోదు చేసుకున్న ప్రతీ రైతుకు ఆధార్ మాదిరిగా ఓ ప్రత్యేకమైన నంబర్ కలిగిన గుర్తింపు కార్డు ఇవ్వనుంది. 'స్వాభిమాని ఫార్మర్' ద్వారా ఈ నంబర్ లభిస్తుంది.
ఈ కార్డు నంబర్ ఆధారంగానే రాష్ట్ర ప్రభుత్వంలోని వివిధ శాఖల నుంచి రైతులు లబ్ధి పొందనున్నారు. ఈ ప్రయోజనాల కోసం రైతులు ఫ్రూట్స్ సాఫ్ట్వేర్ను మాత్రమే ఉపయోగించాలి. 2018 నుంచి రైతుల వివరాలను ఆ సాఫ్ట్వేర్లో నమోదు చేయడం ప్రారంభించింది ప్రభుత్వం.
ప్రూట్స్ సాఫ్ట్వేర్లో రైతు ఆధార్ కార్డు, ఎస్సీ/ఎస్టీ రైతుల కులం సర్టిఫికెట్, బ్యాంకు వివరాలు, ఫొటో మొదలైనవి పొందుపరుస్తారు. రైతుకున్న భూమి వివరాలు మాత్రం రాష్ట్ర రెవెన్యూ శాఖ ఆధ్వర్యంలోని 'భూమి' సాఫ్ట్వేర్ ద్వారానే తెలుసుకునే అవకాశముంది.
ఇదీ చదవండి:డాల్ఫిన్ను కిరాతకంగా కొట్టి చంపిన దుండగులు
