కాంగ్రెస్, ఆ పార్టీ అగ్రనేత రాహుల్ గాంధీపై తీవ్ర వ్యాఖ్యలు చేశారు జమ్ముకశ్మీర్ గవర్నర్ సత్యపాల్ మాలిక్. ఆర్టికల్ 370పై తమ వైఖరి ఏమిటో కాంగ్రెస్ ఇప్పటికీ స్పష్టంగా చెప్పలేకపోతోందని ఎద్దేవా చేశారు. లోక్సభలో కాంగ్రెస్ పక్షనేత అధిర్ రంజన్ చౌదరి కశ్మీర్ అంశాన్ని ఐరాసకు సంబంధం ఉన్నట్లు పేర్కొన్నప్పుడు రాహుల్ నుంచి స్పందన లేదని గుర్తు చేశారు.
" దేశంలోని గొప్ప కుటుంబం నుంచి వచ్చిన వ్యక్తి రాహుల్ గాంధీ. అందుకే ఆయన గురించి మాట్లాడాలనుకోవట్లేదు. కానీ రాహుల్ 'రాజకీయ బాలుడి'గా ప్రవర్తించారు. దాని పర్యవసానంగానే ఐక్యరాజ్య సమితికి పాకిస్థాన్ రాసిన లేఖలో రాహుల్ పేరు ప్రస్తావనకు వచ్చింది. రానున్న ఎన్నికల ప్రచారంలో కాంగ్రెస్ పార్టీపై ప్రత్యర్థులు ఏమీ చెప్పక్కర్లేదు. కేవలం కాంగ్రెస్ నాయకులు ఆర్టికల్ 370కి మద్దతుదారులని చెబితే చాలు.. ప్రజలే తీర్పు చెబుతారు."
- సత్యపాల్ మాలిక్, జమ్ముకశ్మీర్ గవర్నర్.
కశ్మీరీల సంక్షేమం కోసమే...
కశ్మీరీల ప్రాణాలకు నష్టం కలగకూడదన్న కారణంతోనే ఆంక్షలు విధించినట్లు తెలిపారు సత్యపాల్. మొబైల్, అంతర్జాలాన్ని తీవ్రవాదుల సమీకరణ, శిక్షణకు ఎక్కువగా ఉపయోగించుకున్నారని పేర్కొన్నారు. ఇది కశ్మీర్ ప్రజలకు వ్యతిరేకంగా ఉపయోగించిన ఒక రకమైన ఆయుధం కావటం వల్ల నిలిపివేసినట్లు చెప్పారు. క్రమ క్రమంగా తిరిగి పునరుద్ధరిస్తామన్నారు.
జమ్ముకశ్మీర్ ప్రజల సంస్కృతి, గుర్తింపునకు తాము కట్టుబడి ఉన్నామన్నారు మాలిక్. రాబోయే 3 నెలల్లో 50వేల ఉద్యోగాలు లభించనున్నాయని తెలిపారు. త్వరలో జమ్ముకశ్మీర్‌కు సంబంధించి కేంద్రం అతిపెద్ద నిర్ణయం తీసుకోబోతోందని వెల్లడించారు.
రాజకీయంగా మేలు...
జమ్ముకశ్మీర్‌లో మెహబూబా ముఫ్తీ, ఒమర్‌ అబ్దుల్లా, ఫరూక్ అబ్దుల్లా వంటి నేతల నిర్బంధం గురించి విలేకరులు ప్రశ్నించగా.. ‘వారి గురించి బాధపడొద్దన్నారు గవర్నర్. అది వారి రాజకీయ భవిష్యత్తుకు పనికొస్తుందన్నారు. జైలుకెళ్లిన వారే లీడర్లు అవుతారని... ఎంత ఎక్కువ కాలం జైలులో ఉంటే అంత ఎక్కువగా ఎన్నికల్లో లబ్ధి పొందుతారని తెలిపారు. తాను కూడా 30 సార్లు జైలుకెళ్లినట్లు గుర్తు చేసుకున్నారు.
ఇదీ చూడండి: 'రాహుల్ వ్యాఖ్యల ఆధారంగానే పాక్ ఫిర్యాదు'
