ప్రస్తుతం ప్రపంచవ్యాప్తంగా చర్చించుకుంటున్న ప్రధాన అంశం.. చంద్రయాన్-2. విక్రమ్ ల్యాండర్ను గుర్తించినట్టు ఇస్రో ఆదివారం ప్రకటించింది. ఈ నేపథ్యంలో ప్రజల్లో ఒక్కసారిగా ఆశలు చిగురించాయి. ఇస్రో తదుపరి సమాచారం కోసం ఎదురుచూస్తున్నట్టు సామాజిక మాధ్యమాల్లో అనేక మంది తమ భావోద్వేగ సందేశాలను పంచుకున్నారు.
దేశభక్తి, ఆశ, ఆత్మగౌరవం వంటి అంశాలతో నెటిజన్లు విశేషంగా ట్వీట్లు చేశారు. దీంతో '#విక్రమ్ల్యాండర్ఫౌండ్' ట్రెండింగ్గా మారింది.
శనివారం తెల్లవారుజామున చందమామపై అడుగుపెట్టే క్రమంలో ఉపరితలానికి 2.1 కిలోమీటర్ల దూరంలో విక్రమ్ ల్యాండర్కు.. ఇస్రో కేంద్రానికి సంబంధాలు తెగిపోయాయి. ఈ నేపథ్యంలో నిరాశకు గురైన శాస్త్రవేత్తలకు యావత్ భారతదేశం అండగా నిలిచింది. ఒక రోజు అనంతరం చంద్రుని ఉపరితలంపై ఉన్న విక్రమ్ ల్యాండర్ ఆచూకీ తెలిసినట్లు ఇస్రో ఛైర్మన్ కె. శివన్ తెలిపారు. అయితే తాము ప్రయత్నించినట్టు ల్యాండర్... జాబిల్లిపై మృదువుగా దిగి ఉండకపోవచ్చన్నారు.
సామాజిక మాధ్యమాల్లో విక్రమ్పై చేసిన పోస్టుల్లో.. ఓ నెటిజన్ ట్వీట్కు విశేష ఆదరణ లభిస్తోంది.
"నా చిన్నప్పుడు.. భారత్ క్రికెట్ మ్యాచ్ ఓడిపోతే ప్రజలు బాధపడటం చూశా. ఇప్పుడు విక్రమ్ ల్యాండర్ కోసం అనేక మంది కన్నీరు పెట్టుకున్నారు. ఇది సరిపోదా భారత్ మారుతోందనడానికి? శాస్త్రవేత్తల కోసం భారతదేశ చిన్నారులు నిద్రలేని రాత్రులు గడుపుతున్నారంటే.. భారత్ విజయం సాధిస్తున్నట్టే. జై హింద్"
-- అయాన్ భట్టాచర్జీ, నెటిజన్.
ఇదీ చూడండి:- చంద్రయాన్-2: ల్యాండర్ ఆచూకీ లభ్యం.. కానీ...
