పొరుగు దేశాలైన భూటాన్, మాల్దీవులకు ఔషధ ఉత్పత్తుల సాయంలో భాగంగా అందిస్తోన్న కొవిడ్-19 టీకాలు ఆయా దేశాలకు చేరుకున్నాయి. భూటాన్, మాల్దీవులకు టీకాల తొలి కన్సైన్మెంట్ చేరినట్లు ట్వీట్ చేశారు భారత విదేశాంగ మంత్రి ఎస్ జైశంకర్. పొరుగు దేశాలకే తొలి ప్రాధాన్యం అనే విషయానికి ఇది మరో ఉదాహరణ అని, ఆయా దేశాలతో ప్రత్యేక స్నేహాన్ని సూచిస్తోందని పేర్కొన్నారు.
ఈ సందర్భంగా సంతోషం వ్యక్తం చేశారు మాల్దీవుల విదేశాంగ మంత్రి అబ్దుల్లా షాహిద్.
" లక్ష కొవిషీల్డ్ డోసులు పొందటం చాలా సంతోషంగా ఉంది. భారత్ నుంచి టీకాలు పొందిన తొలి దేశంగా మాల్దీవులు నిలిచింది. ఏ విపత్తులోనైనా భారత్ మాకు మద్దతుగా నిలుస్తోంది."
- అబ్దుల్లా షాహిద్, మాల్దీవుల విదేశాంగ మంత్రి.
సీరం సంస్థ అభివృద్ధి చేసిన కొవిషీల్డ్ టీకాలను భూటాన్కు 1.5 లక్షల డోసులు, మాల్దీవులకు లక్ష డోసులు అందిస్తోంది భారత్. బుధవారం ఉదయం ముంబయిలోని ఛత్రపతి శివాజీ అంతర్జాతీయ విమానాశ్రయం నుంచి ఆయా దేశాలకు టీకాలతో విమానాలు వెళ్లాయి.
పొరుగు దేశాలకు ఔషధ ఉత్పత్తుల సాయం కింద పలు దేశాలకు కరోనా వ్యాక్సిన్లు పంపుతోంది భారత్. భూటాన్, మాల్దీవులు, బంగ్లాదేశ్, మయన్మార్, సీషెల్స్కు నేటి నుంచి టీకాలు సరఫరా చేస్తోంది. అలాగే.. శ్రీలంక, అఫ్గానిస్థాన్, మారిషస్ దేశాల నుంచి అందే విజ్ఞప్తుల మేరకు టీకాలు సరఫరా ప్రారంభం కానున్నాయి.
ఇదీ చూడండి: ప్రమాణ స్వీకారానికి 'డుమ్మా' జాబితాలో ట్రంప్
