జమ్ముకశ్మీర్లో ఉగ్రదాడులకు సంబంధించి పాకిస్థాన్పై తీవ్రస్థాయిలో మండిపడ్డారు భారత సైన్యాధిపతి జనరల్ ఎంఎం నరవాణే. పాకిస్థాన్ ఇప్పటికీ అనాలోచితంగా, సంకుచితంగా వ్యవహరిస్తూ.. కశ్మీర్లోకి ఉగ్రవాదాన్ని ఎగదోస్తోందని ఆరోపించారు.
పీటీఐ వార్తాసంస్థతో ప్రత్యేకంగా మాట్లాడిన ఆయన.. హంద్వాడా ఎదురుకాల్పుల్లో స్థానిక ప్రజలను కాపాడేందుకు ఐదుగురు సైనికులు అమరులు అయ్యారని అన్నారు. ఈ ఉగ్రవాద ప్రాయోజిత విధానాన్ని పొరుగుదేశం వదులుకోకపోతే భారత్ సరైన సమయంలో గట్టిగా బదులిస్తుందని హెచ్చరించారు.
"కాల్పుల విరమణ ఉల్లంఘన, ఉగ్రవాదానికి మద్దతుగా నిలిచే పాక్కు భారత సైన్యం దీటైన జవాబిస్తుంది. ఆ ప్రాంతంలో శాంతి నెలకొనేందుకు పాకిస్థాన్పైనే బాధ్యత ఉంది. వాళ్లు ఈ చర్యలు మానుకోకపోతే సరైన సమయంలో కచ్చితమైన జవాబు ఇస్తాం."
- ఎంఎం నరవాణే, భారత సైన్యాధిపతి
ఇటీవల నియంత్రణ రేఖ వెంబడి చోటుచేసుకున్న చొరబాట్లను పరిశీలిస్తే కరోనాపై పోరులో పాకిస్థాన్కు ఆసక్తి లేనట్లుగానే కనిపిస్తుందని నరవాణే విమర్శించారు. సొంత ప్రజలపై నిర్లక్ష్యం వహించటం వల్లనే ఆ దేశంలో కరోనా కేసులు పెరుగుతున్నాయని అన్నారు. వైద్య పరికరాలు కొరత ఆ దేశాన్ని తీవ్రంగా వేధిస్తోందన్నారు.
సార్క్ సమావేశంలోనూ పాక్ వైఖరి ఏంటో స్పష్టంగా అర్థమైందని నరవాణే వివరించారు. కరోనా నేపథ్యంలో పౌరుల ఆరోగ్యం గురించి కాకుండా కశ్మీర్లో మానవ హక్కులపైన మాట్లాడిందని పేర్కొన్నారు.
"నియంత్రణ రేఖ వద్ద అమాయక పౌరులే లక్ష్యంగా పాక్ కాల్పుల విరమణ ఒప్పందం ఉల్లంఘనకు పాల్పడుతూ రోజురోజుకూ తీవ్రత పెంచుతోంది. ఈ చర్యలతో ప్రపంచానికి పాక్ ప్రమాదకారిగా మారుతుంది. తన సొంత పౌరులకు ఉపశమనం కల్గించటంపై ఆ దేశానికి ఆసక్తి లేదు."
- ఎంఎం నరవాణే, సైన్యాధిపతి
ఉగ్ర పరిశీలన జాబితా నుంచి అనేక మంది కరుడుగట్టిన తీవ్రవాదుల పేర్లను తొలగించటం పాక్ వైఖరిని తెలియజేస్తోందన్నారు సైన్యాధిపతి. ఎఫ్ఏటీఎఫ్ సిఫార్సులను అమలు చేయటంలో గుడ్డిగా ప్రవర్తిస్తోందని ఆరోపించారు.
"భారత్తో పాటు అఫ్గానిస్థాన్లో ఉగ్ర హింసకు పాక్ ప్రయత్నిస్తోంది. తాలిబన్కు సైనిక, ఆర్థికపరంగా సాయం అందిస్తోంది. అఫ్గాన్లో భద్రతాదళాలపై ఆకస్మాత్తు దాడులు, మత్తు పదార్థాల రవాణా, హవాలా, ఇంధన వివాదం వంటి అంశాలను ప్రోత్సహిస్తోంది."
- ఎంఎం నరవాణే, సైన్యాధిపతి
పాక్ సమన్లు..
భారత సీనియర్ దౌత్యవేత్తకు పాకిస్థాన్ సమన్లు జారీ చేసింది. గిల్గిత్-బాల్టిస్థాన్లో సార్వత్రిక ఎన్నికలు నిర్వహించాలన్న పాక్ సుప్రీంకోర్టు తీర్పును భారత్ వ్యతిరేకించిన విషయంలో వివరణ ఇవ్వాలని కోరింది.
పాక్ కోర్టు తీర్పుపై భారత్ తీవ్రంగా మండిపడింది. ఆ ప్రాంతమంతా భారత్లో అంతర్భాగమని స్పష్టం చేసింది. ఆక్రమించుకున్న ప్రాంతాలను పాక్ వెంటనే ఖాళీ చేయాలని తీవ్ర హెచ్చరికలు జారీ చేసింది భారత్.
ఇదీ చూడండి: కరోనా వీరులకు సైన్యం సలాం-మోదీ, షా ప్రశంసలు
