జమ్ముకశ్మీర్లోని పరిస్థితులపై ఐక్యరాజ్య సమితి (ఐరాస) మానవ హక్కుల హైకమిషనర్ కార్యాలయం విడుదల చేసిన తాజా నివేదికపై నిరసన వ్యక్తం చేసింది భారత్. గతంలోని 'తప్పుడు, ప్రేరేపిత' ప్రచారానికి ఇది కొనసాగింపని పేర్కొంది. పాకిస్థాన్ నుంచి వచ్చే సరిహద్దు ఉగ్రవాద సమస్యను విస్మరించారని ఆరోపించింది.
గత ఏడాది ఐరాస మానవ హక్కుల హైకమిషనర్(ఓహెచ్సీహెచ్ఆర్) కార్యాలయం కశ్మీర్లోని పరిస్థితులపై మొదటిసారి నివేదిక రూపొందించింది. సోమవారం మరో నివేదికను విడుదల చేసింది. "కశ్మీర్లో అనేక ఆందోళనలు ఉద్భవిస్తున్నప్పటికీ సమస్య పరిష్కారానికి భారత్, పాకిస్థాన్ పటిష్ఠమైన చర్యలు తీసుకోవట్లేదు" అని నివేదికలో పేర్కొంది.
ఐరాస నివేదికను తప్పుపట్టారు విదేశాంగ శాఖ ప్రతినిధి రవీష్కుమార్.
" జమ్ముకశ్మీర్లోని పరిస్థితులపై ఓహెచ్సీహెచ్ఆర్ నివేదిక కేవలం గతంలోని తప్పుడు, ప్రేరేపిత ప్రచారాలకు కొనసాగింపు. పాకిస్థాన్ నుంచి వచ్చే సరిహద్దు ఉగ్రవాదుల దాడులతో చాలా ఏళ్లుగా రాష్ట్రంలో ఏర్పడిన పరిస్థితులను, దాడుల్లో చనిపోయిన వారి వివరాలను పరిగణనలోకి తీసుకోకుండా విశ్లేషించారు. నివేదిక నవీకరణ కేవలం పాక్, భారత్ల మధ్య కృత్రిమ సమానత్వాన్ని సృష్టించేందుకు చేసిన ప్రయత్నమే. తాజా నివేదికపై ఐరాస మానవ హక్కుల హైకమిషనర్ కార్యాలయం వద్ద నిరసన వ్యక్తం చేశాం."
- రవీష్ కుమార్, విదేశాంగ శాఖ ప్రతినిధి
ఇదీ చూడండి: 'పిల్లల స్కూల్ బ్యాగ్లు బరువుగా లేవులే'
