ఒక్కరోజులో 24,248 కేసులు.. మూడో స్థానానికి భారత్​

భారత్​పై కరోనా వైరస్​ పంజా విసురుతోంది. కొత్తగా 24,248కేసులు నమోదు కాగా.. మొత్తం కేసుల సంఖ్య 6,97,413కు చేరింది. మరో 425మంది మరణించారు. దీంతో మృతుల సంఖ్య 19,693కు పెరిగింది. మరోవైపు ప్రపంచవ్యాప్తంగా అత్యధిక కేసుల జాబితాలో మూడో స్థానానికి చేరింది భారత్​.

దేశంలో కరోనా వైరస్​ ప్రకంపనలు కొనసాగుతున్నాయి. తాజాగా 24,248మందికి వైరస్​ సోకింది. మరో 425మంది వైరస్​ ధాటికి ప్రాణాలు కోల్పోయారు.

ఒక్కరోజులో 24,248 కేసులు.. 425 మరణాలు

• మహారాష్ట్రలో వైరస్​ ఉద్ధృతి కొనసాగుతోంది. మొత్తం కేసుల సంఖ్య 2,06,619చేరింది. వీరిలో 8,822 మంది వైరస్​కు బలయ్యారు.
• తమిళనాడులో మొత్తం కేసుల సంఖ్య 1.10లక్షలు దాటింది. ఇప్పటి వరకు 1,11,151మందికి వైరస్​ సోకింది. 1,510మంది మరణించారు.
• దిల్లీలో కేసుల సంఖ్య లక్షకు చేరువైంది. మొత్తం మీద 99,444 కేసులు నమోదయ్యాయి. మృతుల సంఖ్య 3,067కు పెరిగింది.
• గుజరాత్​లో మొత్తం 36,037 కేసులు వెలుగుచూశాయి. 1,943 మంది కరోనా కారణంగా చనిపోయారు.

మూడో స్థానానికి భారత్​...

తాజా గణాంకాలతో అత్యధిక కేసులున్న దేశాల జాబితాలో రష్యా(6,81,251)ను వెనక్కి నెట్టి మూడో స్థానానికి చేరింది భారత్. తొలి రెండు స్థానాల్లో అమెరికా, బ్రెజిల్​ దేశాలు కొనసాగుతున్నాయి. భారత్​- బ్రెజిల్​ మధ్య దాదాపు 10లక్షల కేసుల వ్యత్యాసముంది.

ఇదీ చూడండి:- నాడు ఫ్లూ.. నేడు కరోనాను జయించిన 106 ఏళ్ల వృద్ధుడు