రక్షణ ఉత్పత్తులను తయారు చేసి విదేశాలకు ఎగుమతి చేయటంలో భారత్ దూసుకెళ్తోంది. ఐరోపా దేశాలతో భారీ స్థాయిలో రక్షణ ఒప్పందాలను కుదుర్చుకోవటంలో రష్యా, పోలాండ్ దేశాలను వెనక్కి నెట్టింది. అర్మెనియా దేశానికి ఆయుధాలను గుర్తించే 4 రాడార్ వ్యవస్థలను అందించేందుకు ఒప్పందం చేసుకుంది. ఇందుకోసం భారత్కు 40 మిలియన్ డాలర్లు చెల్లించనుంది అర్మెనియా.
" ఐరోపాలోని అర్మెనియాకు ఆయుధాలు గుర్తించే 4 స్వాతి రాడార్లను అందించేందుకు ఈ ఒప్పందం కుదిరింది. ఈ రాడార్లను భారత రక్షణ పరిశోధన, అభివృద్ధి సంస్థ (డీఆర్డీఓ) అభివృద్ధి చేయగా.. భారత్ ఎలక్ట్రానిక్స్ లిమిటెడ్ (బీఈఎల్) తయారు చేసింది. అర్మెనియాకు ఆయా సామగ్రిని అందించే ప్రక్రియ ఇప్పటికే ప్రారంభమైంది. మేక్ ఇన్ ఇండియా కార్యక్రమంలో ఇది గొప్ప విజయమనే చెప్పాలి. "
- ప్రభుత్వ వర్గాలు
రష్యా, పోలాండ్ దేశాల రాడార్ వ్యవస్థలను ముందుగా పరిశీలించిన అర్మెనియన్ దేశం.. వాటిని కాదని భారత్ రూపొందించిన రాడార్లను కొనుగోలు చేసేందుకు నిర్ణయించుకున్నట్లు తెలిపాయి ప్రభుత్వ వర్గాలు.
50 కిలోమీటర్ల పరిధిలో
స్వదేశీ పరిజ్ఞానంతో రూపొందించిన స్వాతి రాడార్ వ్యవస్థ.. 50 కిలోమీటర్ల పరిధిలో శత్రుమూకల మోర్టార్ షెల్స్, రాకెట్స్ వంటి ఆయుధాలను వేగంగా, స్వయంచాలితంగా వాటి కచ్చితమైన స్థానాలను గుర్తిస్తుంది. వివిధ ప్రాంతాల నుంచి వేరు వేరు ఆయుధాల నుంచి పేలిన బాంబులను ఒకేసారి గుర్తించగలదు.
ప్రస్తుతం ఇదే రాడార్ వ్యవస్థను పాకిస్థాన్ దాడులను ఎదుర్కొనేందుకు భారత సైన్యం వినియోగిస్తోంది.
ఇదీ చూడండి: 3 పరోటాలు తింటే రూ.లక్ష ప్రైజ్.. జీవితాంతం భోజనం ఫ్రీ!
