బిహార్లో విద్య, వైద్య వ్యవస్థను నితీశ్ కుమార్ ప్రభుత్వం నాశనం చేసిందని ఆర్జేడీ నేత తేజస్వీ యాదవ్ చేసిన వ్యాఖ్యలపై భాజపా అధ్యక్షుడు సంజయ్ జైస్వాల్ స్పందించారు. లాలూ కుటుంబంపై వ్యంగ్యంగా విమర్శలు చేశారు. తాము మరోసారి అధికారంలోకి వస్తే ఇద్దరు మాజీ సీఎంల కుమారులు పదో తరగతి పాస్ అవడంలో సహకరిస్తామని అన్నారు.
తేజస్వీ, తేజ్ ప్రతాప్ తల్లిదండ్రులు లాలూ యాదవ్, రబ్రి దేవీ.. గతంలో బిహార్ ముఖ్యమంత్రులుగా పనిచేశారు.
"విద్యా వ్యవస్థ గురించి మాట్లాడితే.. గత 15 ఏళ్లలో సీఎం నితీశ్కుమార్ ప్రభుత్వం విద్యార్థులకు సైకిళ్లు, పుస్తకాలు, యూనిఫామ్లు పంపిణీ చేసింది. అయితే గతంలోని ఇద్దరు ముఖ్యమంత్రులు మాత్రం తమ పిల్లలను పదోతరగతి చదివేలా ప్రోత్సహించలేకపోయారు. వాళ్లు నితీశ్ 15 ఏళ్ల పాలనపై ఆరోపణలు చేస్తుంటే పట్టించుకోవాలా? పదో తరగతి పాస్ కాని ఆర్జేడీ సభ్యులు వచ్చే ఏడాది ఉత్తీర్ణత సాధించేందుకు మేము సహకరిస్తాం."
- సంజయ్ జైస్వాల్, బిహార్ భాజపా అధ్యక్షుడు
బిహార్ అసెంబ్లీ ఎన్నికల్లో భాగంగా అక్టోబర్ 28న తొలిదశ పోలింగ్ ముగిసింది. మూడు దశల్లో జరగనున్న ఈ ఎన్నికల్లో.. మొదటి దఫాలో మొత్తం 71 స్థానాలకు 1,066 మంది అభ్యర్థులు పోటీపడ్డారు. నవంబర్ 3న రెండోదశ, నవంబర్ 7న మూడోదశ పోలింగ్ జరగనుంది. నవంబర్ 10న అసెంబ్లీ ఎన్నికల ఫలితాలు వెలువడనున్నాయి.
