భారీగా ఓట్లు కొల్లగొట్టి అధికార పీఠం దక్కించుకునేందుకు.. అన్ని అస్త్రాలకు పదును పెడుతున్నాయి బిహారీ పార్టీలు. సోషల్ ఇంజినీరింగ్లో ఆరితేరిన నేతలు ప్రజాకర్షక హామీలతో ముందుకొస్తున్నారు. సామాజిక వర్గాల సమీకరణల ఆధారంగా ఓటు బ్యాంకును సుస్థిర పరుచుకునే ప్రయత్నం చేస్తున్నారు. కులం కార్డు.. గెలుపు తీరాలకు చేర్చుతుందని భావించే ఈ ఎన్నికలలో కొన్ని అగ్రవర్ణాలు కీలకం కానున్నాయి.
సామాజిక వర్గం మద్దతు బిహార్లో ఎప్పుడూ చోదక శక్తిలా పని చేస్తుంటుంది. ముఖ్యంగా అగ్రవర్ణాలు ఎన్నికల ఫలితాలపై గట్టి ప్రభావమే చూపుతాయి. ఈ లెక్కల్లో ప్రధానంగా బ్రాహ్మణులు, రాజ్పుత్లు, భూమిహర్లు సహా అగ్రవర్ణాల్లోని ఉపకులాలతో కలుపుకుని దాదాపు 15% ఓట్లు ఉంటాయి.
సంప్రదాయ మద్దతు కమలానికే..
సంప్రదాయంగా వీరి మద్దతు భాజపా, ఆ పార్టీ మిత్రపక్షాలకే ఉంటుంది. ప్రతి పార్టీకి ప్రత్యేకంగా కొన్ని కులాల మద్దతు ఉన్న పరిస్థితుల్లోనూ.. అగ్రకులాలను ప్రసన్నం చేసుకునేందుకు తీవ్రంగా శ్రమిస్తుంటాయి పార్టీలు. ఈ నేపథ్యంలో పార్టీ ఏదైనా.. అగ్రవర్ణాలకు ప్రత్యేక కోటా ఉంటుంది. అందుకు అనుగుణంగానే సీట్ల కేటాయింపు జరుగుతుంటుంది. అగ్రకులాల నేతలను చేర్చుకునేందుకు పార్టీలు సైతం పోటీ పడుతుంటాయి. అయితే, భాజపా ఎప్పటికప్పుడు వీరి సమస్యలపై పోరాటం చేస్తూ.. మద్దతు కూడగట్టుకుంది.
బిహార్లో ఉన్న 243 అసెంబ్లీ స్థానాల్లో 40 నియోజకవర్గాలు రిజర్వ్డ్ కేటగిరిలో ఉన్నాయి. 38 స్థానాలు ఎస్సీలకు కేటాయించగా, 2 స్థానాలు ఎస్టీలకు అట్టిపెట్టారు. ప్రస్తుతం శాసనసభలో 53 మంది చట్టసభ్యులు అగ్రకులాలకు చెందినవారే ఉన్నారు.
ఈ అగ్రవర్ణాలు భాజపాకు మద్దతు ఇవ్వటానికి అనేక కారణాలు కనిపిస్తున్నాయి. ముఖ్యంగా మండల్ కమిషన్ ద్వారా 90వ దశకంలో జనతా పార్టీ వెనుకబడిన వర్గాలు, ఓబీసీల వెంట నిలిచింది. అదే అదునుగా భాజపా అగ్రవర్ణాలను అక్కున చేర్చుకుంది. ఆ తర్వాత క్రమంగా వారి మద్దతు పెంచుకుంటూ వస్తోంది. గతంలో కాంగ్రెస్కు విధేయులుగా ఉన్న వీరంతా.. హస్తం పార్టీ లాలూకు మద్దతు తెలపటం వల్ల దూరమవుతూ వచ్చారు.
ఇదీ చూడండి: బిహార్ బరి: సం'కుల' సమరంలో గెలుపు ఎవరిది?
అగ్రవర్ణాలను ఆదరించని లాలూ
ఇక లాలూ గద్దెనెక్కిన తర్వాత.. వీరికి మరిన్ని కష్టాలు మొదలయ్యాయి. లాలూ పరోక్షంగా.. భుమిహర్, రాజ్పుత్, బ్రాహ్మణులతోపాటు లాలా కులాలను దూరం పెడుతూ వచ్చారు. దీంతో ఆర్జేడీ మిత్ర పక్షాలకు పూర్తిగా దూరమయ్యాయి ఈ వర్గాలు.
అనంతరం, దళిత వర్గానికి చెందిన మావోయిస్టులు- భూమిహర్ వర్గానికి చెందిన రణ్వీర్ సేన మధ్య ఉద్రిక్తతలు చోటు చేసుకున్నాయి. 1999 మార్చిలో జహానాబాద్లోని సెనారి గ్రామంలో 34 మంది భూమిహర్లను పొట్టనబెట్టుకుంది మావోయిస్టు దళం. ముఖ్యమంత్రిగా ఉన్న లాలూ కనీసం ఈ ప్రాంతానికి పరామర్శించటానికి రాకపోవటం మరింత వ్యతిరేకత మూటగట్టుకునేలా చేసింది.
జేడీయూకూ కష్టమే !
అయితే, ఈ అగ్రవర్ణాల ఓటర్లు భాజపా అభ్యర్థులకు మాత్రమే ఓటేస్తారని... ఎన్డీఏలో భాగంగా ఉన్నా జేడీయూ అభ్యర్థులకు మద్దతు తెలపటం కష్టమేనని అంటున్నారు విశ్లేషకులు. అగ్రకులాల్లోని పెద్దలు మద్దతు కూడగట్టడంలో కీలకంగా ఉంటారు. కీలక నిర్ణయాలను ప్రభావితం చేయగలుగుతుంటారు.
ఈ నేపథ్యంలో.. అగ్రవర్ణాల ఓటర్ల ప్రాధాన్యం గుర్తించిన సీఎం నితీశ్ కుమార్ వారిని ఆకట్టుకునేందుకు అనేక ప్రయత్నాలు చేశారు. ముఖ్యంగా 2011లో అగ్రవర్ణాల కోసం ప్రత్యేక కమిషన్ ఏర్పాటు చేశారు. వారి ఆర్థిక స్థితి మెరుగుపర్చటమే లక్ష్యంగా చర్యలు చేపట్టారు. అ తర్వాత ఈ మండలిని రద్దు చేశారు. 2013లో భాజపా-జేడీయూ మధ్య తెగదెంపులు జరిగిన తర్వాత... ఈ వర్గం ఓటర్ల మద్దతు కోల్పోకుండా భాజపా జాగ్రత్త పడింది.
ఇదీ చూడండి: బిహార్లో గెలుపుపై ఎవరి ధీమా వారిదే..
ఆర్జేడీ ప్రయత్నాలు
తాజాగా ఆర్జేడీ సైతం అగ్రవర్ణాల ఓటర్లను ఆకట్టుకునేందుకు ప్రయత్నాలు చేస్తోంది. గత కొన్నేళ్లుగా వారికి పార్టీలో కీలక పదవులు కట్టబెడుతోంది. అధికార పీఠం దక్కాలంటే ముస్లిం-యాదవ ఓటర్లతో పాటు వీరి ఓట్లు కీలకమేనని గుర్తించి ఆ దిశగా అడుగులు వేస్తోంది.
వారిని ప్రసన్నం చేసుకునేందుకు భూమిహర్కు చెందిన కాంగ్రెస్ అభ్యర్థి అఖిలేష్ సింగ్ను రాజ్యసభకు పంపేందుకు మద్దతు తెలిపింది. సొంత పార్టీ తరఫునా అదే వర్గానికి చెందిన అమరేంద్ర సింగ్ను పెద్దల సభకు పంపించింది.
కానీ, ఎన్డీఏ ప్రభుత్వం అగ్రవర్ణాల్లో పేదల కోసం తీసుకొచ్చిన 10% రిజర్వేషన్ల బిల్లును ఆర్జేడీ వ్యతిరేకించటం ఆ వర్గాల అభిమానం చూరగొనటం కష్టతరం చేసింది.
ఇదే సమయంలో భాజపాకు పూర్తి స్థాయిలో మద్దతు తెలుపుతున్న అగ్రవర్ణాలను.. తిరిగి తమవైపునకు తిప్పుకోవటం కాంగ్రెస్కు అసాధ్యంగానే కనిపిస్తోంది.
మొత్తంగా బిహార్ ఎన్నికలపై అగ్రవర్ణాల ప్రభావం... దశాబ్దాలుగా పెరుగుతూ వస్తోంది. అన్ని పార్టీలు వీరి మద్దతు కోసం తీవ్ర ప్రయత్నాలు చేస్తున్నాయి.
ఇదీ చూడండి: బిహార్ బరి: కొత్త పార్టీలకు ఆదరణ దక్కేనా?
ఇదీ చూడండి: బిహార్ పోరు: సందిగ్ధంలోనే సీట్ల పంపకం
ఇదీ చూడండి: ఎన్నికల రణక్షేత్రంలో 'బిహార్ కా షేర్' ఎవరు?
