దేశంలో లాక్డౌన్ ఆంక్షలు సడలించిన నేపథ్యంలో వ్యాపారాలు తెరుచుకుంటున్నాయి. ఇప్పుడిప్పుడే ఉద్యోగులు విధుల్లోకి చేరుతున్నారు. అయితే.. దేశవ్యాప్తంగా ఈ నెల 8 నుంచి ప్రార్థనా మందిరాలు, ఆలయాలు, రెస్టారెంట్లు, హోటళ్లు తెరుచుకోనున్నాయి. ఈ నేపథ్యంలో వీటికి సంబంధించిన మార్గదర్శకాలను జారీ చేసింది కేంద్ర ఆరోగ్య, కుటుంబ సంక్షేమ శాఖ.
- మాస్కులు తప్పనిసరిగా ధరించాలి. తరుచుగా చేతులు శుభ్రం చేసుకోవాలి. శానిటైజర్ వినియోగించాలి.
- బహిరంగ ప్రదేశాల్లో తప్పనిసరిగా 6 అడుగుల భౌతిక దూరం పాటించాలి. ఎక్కడపడితే అక్కడ ఉమ్మి వేయకూడదు.
- ఆరోగ్య సేతు యాప్ ఇన్స్టాల్ చేసుకోవాలి.
- ప్రార్థనా మందిరాలు, పని ప్రదేశాలు, హోటళ్లలో ప్రవేశ మార్గాల్లోనే థర్మల్ స్క్రీనింగ్, శానిటైజింగ్ తప్పనిసరిగా నిర్వహించాలి.
- హోటళ్లు, రెస్టారెంట్లలోకి ఎసింప్టొమాటిక్(ఎలాంటి లక్షణాలు లేని వారు) సిబ్బంది, కస్టమర్లను మాత్రమే అనుమతించాలి. సిబ్బందిలో.. వయస్సుపైబడిన వారు, గర్భిణీలు, ఆరోగ్య సమస్యలతో సతమతమవుతున్న వారు ఎవరైనా ఉంటే.. అదనపు జాగ్రత్తలు తీసుకోవాలి.
- పార్కింగ్, రెస్టారెంట్ పరిసర ప్రాంతాల్లో తప్పనిసరిగా భౌతిక దూరం పాటించాలి. శానిటైజింగ్ చేస్తూ సరైన నియంత్రణ చర్యలు చేపట్టాలి.
- వినియోగదారులు, సిబ్బంది లోపలికి వచ్చేందుకు, బయటికి వెళ్లేందుకు వేరు వేరు దారులు ఉండాలి.
- డిజిటల్ విధానం ద్వారా ఆర్డర్ తీసుకునేలా వినియోగదారులను ప్రోత్సహించాలి.
- హోటళ్లు, ఆతిథ్య రంగ సేవల విభాగాల్లో అతిథుల ప్రయాణ, ఆరోగ్య వివరాలు తప్పనిసరిగా నమోదు చేయాలి. వాటితో పాటు గుర్తింపు, స్వీయ అంగీకార పత్రం తీసుకోవాలి. లగేజీని అనుమతించే ముందే క్రిమిసంహారకాలతో శుద్ధి చేయాలి. ఆట స్థలాలను మూసి ఉంచాలి.
- రెస్టారెంట్లలో సీటింగ్ 50శాతం తగ్గించాలి. వాడిపడేసే వస్తువులకే ఎక్కువ ప్రాధాన్యం ఇవ్వాలి.
