'చిదంబరాన్ని దోషిగా చూపేందుకు ప్రభుత్వం కుట్ర'

ఐఎన్​ఎక్స్​ కేసులో కేంద్ర మాజీ మంత్రి చిదంబరంపై నిరాధారంగా మీడియాలో కథనాలు ప్రసారం చేస్తున్నారని ఆయన కుటుంబ సభ్యులు ఆగ్రహం వ్యక్తం చేశారు. ఆయనను దోషిగా చూపేందుకు ప్రభుత్వం కుట్ర చేస్తోందని ఆరోపించారు.

ఐఎన్​ఎక్స్ మీడియా కేసులో కేంద్ర మాజీ మంత్రి పి.చిదంబరాన్ని దోషిగా చూపేందుకే కేంద్ర ప్రభుత్వం ప్రయత్నిస్తోందని ఆరోపించారు ఆయన కుటుంబ సభ్యులు. వివిధ దేశాల్లో ఆస్తులు, డొల్ల కంపెనీలు ఉన్నాయన్న ఆరోపణలకు సమాధానమివ్వాలని డిమాండ్​ చేశారు. ఈ విషయంలో మీడియా నిగ్రహంగా వ్యవహరించట్లేదని విమర్శించారు.

"మాకు వివిధ దేశాల్లో ఆస్తులు, బహుళ బ్యాంక్ ఖాతాలు, డొల్ల కంపెనీలు ఉన్నాయన్న ఆరోపణలను విని ఆశ్చర్యపోయాం. వీటిన్నింటికీ ఒక చిన్న ఆధారాన్నైనా చూపాలని ప్రభుత్వాన్ని డిమాండ్ చేస్తున్నాం. మీడియా క్రూరంగా, నిజ నిర్ధరణ చేయకుండా, నిరాధారంగా కథనాలు ప్రసారం చేస్తోంది. ఇలాంటి వార్తలపై మీడియా నిగ్రహంగా ఉండాలి. స్వేచ్ఛ, గౌరవాన్ని కాపాడుకోవాలి."
- చిదంబరం కుటుంబం.

న్యాయస్థానం నిర్ణయించేవరకూ ప్రతి వ్యక్తి నిర్దోషేనని చిదంబరం కుటుంబం వ్యాఖ్యానించింది. 50 ఏళ్ల ప్రజాజీవితంలో ఆయన నిజాయితీగా దేశానికి సేవ చేశారనీ, అపవాదులు చరిత్రను మార్చలేవని వ్యాఖ్యానించారు. తమకు ధనం సమృద్ధిగా ఉందని, పన్నులు చెల్లిస్తున్నామని పేర్కొంది.

ఇదీ చూడండీ:ప్రయాణికులకు రైల్వే శాఖ భారీ డిస్కౌంట్..!