దేశంలో కరోనా వ్యాక్సిన్ తయారీ ప్రక్రియను వేగవంతం చేయడం సహా ప్రజలందరికీ సులభంగా అందుబాటులో ఉండే టీకా అభివృద్ధి కోసం 'మిషన్ కొవిడ్ సురక్ష'ను కేంద్రం ప్రారంభించనున్నట్లు అధికార వర్గాలు తెలిపాయి. రూ. 3 వేల కోట్ల ప్రారంభ నిధితో దీనికి శ్రీకారం చుట్టనున్నట్లు వెల్లడించాయి.
జీవసాంకేతిక శాఖ ఆధ్వర్యంలో ఏర్పాటు చేసే ఈ మిషన్.. టీకా క్లినికల్ ట్రయల్స్ నుంచి తయారీ వరకు ప్రతి ఒక్క దశపై దృష్టిసారిస్తుందని అధికారులు పేర్కొన్నారు. కనీసం ఆరు వ్యాక్సిన్ క్యాండిడేట్లకు లైసెన్సులు లభించేలా చేసి, సత్వరం మార్కెట్లోకి అందుబాటులోకి తీసుకురావడం ఈ కార్యక్రమం ముఖ్య ఉద్దేశమని తెలిపారు.
దీనిపై అధికారికంగా ఎలాంటి ప్రకటన వెలువడనప్పటికీ.. ఈ ప్రతిపాదనలు పూర్తైనట్లు అధికారులు చెబుతున్నారు. మిషన్ కాల వ్యవధి 12 నుంచి 18 నెలలు ఉంటుందని స్పష్టం చేశారు. దేశ అవసరాలకు తీర్చే విధంగా ఈ మిషన్ పనిచేస్తుందని చెప్పారు.
30 వ్యాక్సిన్లు
ప్రస్తుతం దేశంలో 30 వ్యాక్సిన్ క్యాండిడేట్లు వివిధ అభివృద్ధి దశల్లో ఉన్నాయి. ఐసీఎంఆర్, భారత్ బయోటెక్ సంయుక్తంగా తయారు చేస్తున్న టీకాతో పాటు జైడస్ కాడిలా వ్యాక్సిన్లు రెండో దశ మానవ ప్రయోగాల్లో ఉన్నాయి. సీరం ఇన్స్టిట్యూట్ త్వరలో రెండు, మూడో దశ ప్రయోగాలు ప్రారభించనుంది.
ఇదీ చదవండి- సెప్టెంబర్ 1 నుంచి మెట్రో రైల్ సర్వీసులు!
