అయోధ్యలో రామ మందిర నిర్మాణానికి భాజపా ఎంపీ, టీమ్ఇండియా మాజీ ఓపెనర్ గౌతమ్ గంభీర్ కోటి రూపాయలు విరాళం ఇచ్చారు. భారతీయుల చిరస్మరణీయమైన కల అయిన రామాలయ నిర్మాణానికి తమ కుటుంబం తరఫున ఈ సాయమందిస్తున్నట్టు చెప్పారు.
"అయోధ్యలో చరిత్రాత్మక రామాలయ నిర్మాణం అనేది భారతీయుల కల. సుదీర్ఘకాలంగా ఉన్న ఈ సమస్యకు ఎట్టకేలకు తెరపడింది. రామ మందిరంతో ఐక్యత, ప్రశాంతతకు మార్గం సుగమమవుతుంది. ఈ ప్రయత్నంలో నా కుటుంబం తరఫున చిన్న సాయమందిస్తున్నాను."
- గౌతమ్ గంభీర్, తూర్పు దిల్లీ ఎంపీ.
మరోవైపు.. దిల్లీవ్యాప్తంగా విరాళాల సేకరణ కోసం ప్రచారం ప్రారంభమైందని భాజపా నాయకులు తెలిపారు.
బంగాల్ గవర్నర్ రూ.5లక్షలు
రామమందిర నిర్మాణం కోసం బంగాల్ గవర్నర్ జగ్దీప్ ధన్కర్, ఆయన భార్య రూ.5,00,001 విరాళంగా ఇచ్చారు. ఈ మేరకు సంబంధిత చెక్కును ఆలయ ట్రస్ట్ అధికారులకు అందజేసినట్టు రాజ్భవన్ ఓ ప్రకటనలో తెలిపింది.
ఇదీ చదవండి: యూపీలో కాంగ్రెస్ 'క్యాలెండర్ రాజకీయాలు'
