నీతి ఆయోగ్ పాలక మండలి సమావేశానికి ముందు కాంగ్రెస్ కీలక భేటీ నిర్వహించింది. కాంగ్రెస్ పాలిత రాష్ట్రాల ముఖ్యమంత్రులతో మాజీ ప్రధాని మన్మోహన్ సింగ్ ప్రత్యేకంగా భేటీ అయ్యారు. నీతి ఆయోగ్ సమావేశంలో అనుసరించాల్సిన వ్యూహాలు, లేవనెత్తాల్సిన అంశాలపై మన్మోహన్ సింగ్ పలు సూచలు చేసినట్లు సమాచారం.
ముఖ్యమంత్రులు తమ రాష్ట్రాల్లోని గిరిజనులు, రైతుల సమస్యలను నీతి ఆయోగ్ ముందు ప్రస్తావించాలని సింగ్ దిశానిర్దేశం చేసినట్లు తెలుస్తోంది. ముఖ్యంగా వ్యవసాయ రంగంపై కేంద్రం అశ్రద్ధ, అటవీ చట్టంలో సవరణలు, గిరిజనుల అభివృద్ధి, కాంగ్రెస్ పాలిత రాష్ట్రాల్లో రైతు రుణమాఫీ వంటి విషయాలు ఈ జాబితాలో ఉన్నట్లు సమాచారం.
సింగ్ దూరం...
దిల్లీలోని పార్టీ ప్రధాన కార్యాలయంలో జరిగిన ఈ సమావేశంలో మధ్యప్రదేశ్, రాజస్థాన్, పుదుచ్చేరి, కర్ణాటక ముఖ్యమంత్రులు కమల్నాథ్, అశోక్ గెహ్లోత్, నారాయణస్వామి, కుమారస్వామి హాజరయ్యారు. అనారోగ్యం కారణంగా పంజాబ్ ముఖ్యమంత్రి అమరీందర్ సింగ్ రాలేదు.
కాంగ్రెస్ పాలిత రాష్ట్రాల్లో నెలకొన్న సమస్యలపైనా మన్మోహన్ ఆరా తీసినట్లు పార్టీ వర్గాల సమాచారం.
- ఇదీ చూడండి: అప్పు కట్టలేదని మహిళపై 10 మంది దాడి
