ఇప్పుడు దేశ ప్రజల దృష్టి అంతా ఉత్తరప్రదేశ్లోని అయోధ్య వైపే. వివాదాస్పద అయోధ్య భూ వివాద కేసుపై సర్వోన్నత న్యాయస్థానం ఈ నెల 17లోపు తీర్పు వెలువరించే అవకాశమున్న తరుణంలో అయోధ్యవాసుల్లో మిశ్రమ స్పందనలు వ్యక్తమవుతున్నాయి. ఎప్పుడు ఏం జరుగుతుందో అని కొందరు స్థానికులు భయాందోళనకు గురవుతుంటే.. మరికొందరు తీర్పు కోసం ఎంతో ఉత్కంఠగా ఎదురుచూస్తున్నారు.
ముందు జాగ్రత్తగా...
తీర్పు తర్వాత ఎలాంటి అవాంఛనీయ సంఘటనలు జరగకూడదని ఆశిస్తున్నప్పటికీ.. ముందు జాగ్రత్త చర్యగా నిత్యావసర వస్తువులు, ఔషధాలు కొనుగోలు చేస్తున్నారు కొందరు అయోధ్యవాసులు.
డా. ఇంద్రోనీల్ బెనర్జీకి.. అయోధ్యలో ఓ క్లీనిక్ ఉంది. సుప్రీం తీర్పు నేపథ్యంలో.. ఇటీవలి కాలంలో అయోధ్య, పరిసర ప్రాంతాల నుంచి తన క్లీనిక్కు రోగుల రద్దీ పెరిగిందని తెలిపారు. తీర్పు వెలువడిన అనంతరం తనను కలిసే అవకాశముంటుందో లేదోనని.. రోగులు ముందుగానే 15 రోజులకు సరిపడా మందులు కొనుగోలు చేస్తున్నారని వివరించారు. తాను మాత్రం... అంతా మంచే జరుగుతుందని, భవిష్యత్తు అంతా బాగుంటుందని వారికి చెబుతున్నట్టు స్పష్టం చేశారు.
"అయోధ్యలోని ప్రజలందరూ(హిందువులు, ముస్లింలు) శాంతి కోరుకుంటున్నారు. అయోధ్య అభివృద్ధిని ఆకాంక్షిస్తున్నారు. తమ మధ్య ఘర్షణలు చెలరేగవని ధీమాగా ఉన్నారు. అతీత శక్తులు ఘర్షణకు కారణమైతే తప్పా.. ఈ నగరంలో హింస చెలరేగదని నాకు నమ్మకంగా ఉంది."
-- డా. ఇంద్రోనీల్ బెనర్జీ, అయోధ్య వాసి.
ఒక వర్గానికి అనుకూలంగా తీర్పు వెలువడినా.. ఎలాంటి సమస్యలు తలెత్తవని మరో వైద్యుడు తెలిపారు. అయోధ్య ప్రజలు ఎంతో పరిణితి చెందారని.. రామమందిర నిర్మాణం చుట్టూ నెలకొన్న రాజకీయాలను పట్టించుకోవడం మానేశారని అభిప్రాయపడ్డారు.
వ్యాపారంపై ప్రభావం!
తీర్పు అనంతరం తమ వ్యాపారం దెబ్బ తినే అవకాశముందని అయోధ్యలోని దుకాణదారులు ఆవేదన వ్యక్తం చేస్తున్నారు. అయోధ్య కేసు తీర్పుపై సర్వత్రా ఉత్కంఠ నెలకొన్న నేపథ్యంలో.. నెల రోజుల నుంచి ఇతర ప్రాంతాల్లో తమ వ్యాపారాలు కుదేలయ్యాయని తెలిపారు.
భారీ బందోబస్తుతో భయం!
తీర్పు నేపథ్యంలో స్థానిక యంత్రాంగం ముందు జాగ్రత ఏర్పాట్లు చేసిందని కొందరు ఉపాధ్యాయులు అభిప్రాయపడ్డారు. అయితే ఇంత భారీ స్థాయిలో పోలీసుల మోహరింపును చూస్తుంటే.. ఎంతో భయంగా ఉందని మరికొందరు వెల్లడించారు.
భారత ప్రధాన న్యాయమూర్తి జస్టిస్ రంజన్ గొగొయ్ ఈ నెల 17న పదవీవిరమణ చేయనున్నారు. ఈ లోపే సర్వోన్నత న్యాయస్థానం.. అయోధ్య కేసు తీర్పునిచ్చే అవకాశముంది.
