సాగు చట్టాలపై కేంద్రం, రైతుల మధ్య పదో దఫా చర్చలు కూడా అసంపూర్తిగానే ముగిశాయి. సుదీర్ఘంగా సాగిన చర్చల్లో కీలక ప్రతిపాదనలు చేసింది కేంద్రం. తొలుత సాగు చట్టాలను ఏడాది పాటు వాయిదా వేస్తామని ప్రతిపాదించగా అందుకు రైతులు నిరాకరించారు. ఆ తర్వాత రెండేళ్లకు పెంచింది కేంద్రం. అయినప్పటికీ రైతుల నుంచి సానుకూలత రాకపోవటంతో కమిటీ వేసి.. నివేదిక వచ్చే వరకూ వ్యవసాయ చట్టాల అమలును నిలిపివేస్తామని ప్రతిపాదించింది. దీనిపై అందరం చర్చించుకుని తుదినిర్ణయం వెల్లడిస్తామని రైతులు తెలిపారు. ఈ క్రమంలో తదుపరి చర్చలను ఈనెల 22కు వాయిదా వేశారు.
కేంద్రం ప్రతిపాదనపై చర్చించేందుకు గురువారం (జనవరి 21న) భేటీ కానున్నారు రైతులు.
