ఏ రాజకీయ పార్టీకి అనుకూలం కాదు: ఫేస్​బుక్​

దేశంలో అధికార, విపక్షాల మధ్య మాటల యుద్ధానికి దారి తీసిన ఆరోపణలపై స్పందించింది ఫేస్​బుక్​. ద్వేషపూరిత, హింసను ప్రేరేపించే సమాచారాన్ని నిషేధించటమే కాక.. ఏ రాజకీయ పార్టీకి అనుకూలంగా ఉండకుండా తమ విధానాలను ప్రపంచవ్యాప్తంగా అమలు చేస్తున్నట్లు స్పష్టం చేసింది. అయితే.. ఈ అంశంలో ఇంకా చేయాల్సింది చాలా ఉందని అంగీకరించింది.

భారత్​లో అధికార భాజపాకు అనుకూలంగా వ్యవహరిస్తోందన్న ఆరోపణలతో రాజకీయ దుమారానికి కేంద్ర బిందువుగా మారింది ఫేస్​బుక్. వాల్​స్ట్రీట్​ జర్నల్​లో వచ్చిన కథనంతో అధికార పార్టీపై కాంగ్రెస్​ ఆరోపణలు చేసింది. ఈ వ్యవహారంపై స్పందించింది సామాజిక మాధ్యమ దిగ్గజం. ద్వేషపూరిత సంభాషణలు, హింసను ప్రేరేపించే భావజాలాన్ని నిషేధించటమే కాదు.. రాజకీయ పార్టీలతో సంబంధం లేకుండా తమ విధానాలు ప్రపంచవ్యాప్తంగా అమలవుతున్నాయని స్పష్టం చేసింది. అయితే.. ఈ అంశంలో ఇంకా చాలా చేయాల్సి ఉందని అంగీకరించింది.

ఫేస్​బుక్​పై అధికార, విపక్షాల మధ్య మాటల యుద్ధం చెలరేగిన నేపథ్యంలో ఈ మేరకు స్పష్టతనిచ్చింది సంస్థ.

" ద్వేషపూరిత సంభాషణలు, హింసను ప్రేరేపించే సమాచారాన్ని నిషేధించాం. ఏ రాజకీయ పార్టీకి అనుబంధంగా ఉండకుండా మా విధానాలను ప్రపంచవ్యాప్తంగా అమలు చేస్తున్నాం. అయినా.. ఈ అంశంలో చాలా చేయాల్సి ఉందని మాకు తెలుసు. ఈ విధానాల అమలులో పురోగతి సాధించాం. సమాచార కచ్చితత్వాన్ని నిర్ధరించడానికి క్రమంగా ఆడిట్​ నిర్వహిస్తున్నాం.

​- ఫేస్​బుక్​ అధికార ప్రతినిధి

దర్యాప్తునకు సీపీఎం డిమాండ్​

ద్వేషపూరిత సంభాషణల నియమాలను ఉల్లంఘించిన భాజపా నేతలపై ఫేస్​బుక్​ చర్యలు తీసుకోవటంలో ఉద్దేశపూర్వకంగా విఫలమైందన్న ఆరోపణలపై దర్యాప్తు చేయాలని డిమాండ్​ చేసింది సీపీఎం. తాజా వ్యవహారంతో సామాజిక మాధ్యమంలో అధికార పార్టీ పెట్టుబడులు ఉన్నాయనే ప్రశ్నలు ఉత్పన్నమవుతున్నాయని పేర్కొంది. భాజపా, ఫేస్​బుక్​ మధ్య సంబంధాలు ఉన్నాయని ఆరోపించింది. అధికార పార్టీకి అనుకూలంగా వ్యవహరించటాన్ని ఖండిస్తున్నట్లు పేర్కొంది.

ఇదీ చూడండి: ఫేస్‌బుక్‌ టార్గెట్​- కాంగ్రెస్, భాజపా మాటల యుద్ధం