సార్వత్రిక ఎన్నికల రెండో దశ కోసం కేంద్ర ఎన్నికల సంఘం విస్తృత ఏర్పాట్లు చేస్తోంది. 11 రాష్ట్రాలు, ఒక కేంద్ర పాలిత ప్రాంతం పరిధిలోని 95 స్థానాలకు గురువారం పోలింగ్ జరగనుంది. మొత్తం 15.79 కోట్ల మంది ఓటర్లు 1629 మంది భవితవ్యాన్ని ఈవీఎంలలో నిక్షిప్తం చేయనున్నారు. ఇందుకోసం లక్షా 81 వేల పోలింగ్ కేంద్రాలను ఈసీ ఏర్పాటు చేస్తోంది.
భారీ భద్రత....
పోలింగ్ కోసం భారీ భద్రతా ఏర్పాట్లు చేసింది ఎన్నికల సంఘం. రాష్ట్రాల పోలీసులతో పాటు పెద్దసంఖ్యలో కేంద్ర బలగాలను మోహరించింది. నక్సల్ ప్రభావిత ప్రాంతాలపై ప్రత్యేక దృష్టిసారించింది.
తమిళనాట లోక్సభతో పాటు శాసనసభకూ..
తమిళనాడులో ఉన్న మొత్తం 39 లోక్సభ స్థానాలకు గానూ 38 స్థానాల్లో ఎన్నిక జరగనుంది. వెల్లూరు నియోజకవర్గానికి పోలింగ్ రద్దు చేస్తూ ఈసీ నిర్ణయం ప్రకటించింది. వీటితో పాటు 18 శాసనసభ నియోజకవర్గాలకు ఉపఎన్నికల పోలింగ్ జరగనుంది.
ఇదీ చూడండి : ద్రవిడ రాజకీయాన్ని మార్చే పోరుకు సర్వం సిద్ధం
కర్ణాటకలో 14....
28 లోక్సభ నియోజకవర్గాలున్న కర్ణాటకలో 14 స్థానాలకు పోలింగ్ జరగనుంది. ఇవి ఎక్కువగా పాత మైసూరు ప్రాంతంలో ఉన్నవి. ఇక్కడ జేడీఎస్కు మంచి పట్టుంది.
మండ్య నుంచి ప్రముఖులు బరిలో ఉన్నారు. ముఖ్యమంత్రి కుమార స్వామి కుమారుడు నిఖిల్ గౌడ, సినీ నటి సుమలత ఇక్కడ పోటీ చేస్తున్నారు. బెంగళూరు సెంట్రల్ నుంచి సినీ నటుడు ప్రకాశ్ రాజ్ స్వతంత్ర అభ్యర్థిగా బరిలోకి దిగారు.
మిగతా రాష్ట్రాలు...
ఉత్తరప్రదేశ్లో 8, బంగాల్లో 3, బిహార్లో 5, అసోంలో 5 స్థానాలకు పోలింగ్ జరగనుంది.
