మరో ఆరు నెలలపాటు నాగాలాండ్ను 'కల్లోలిత ప్రాంతం'గా కేంద్ర హోం మంత్రిత్వ శాఖ బుధవారం ప్రకటించింది. ఈ ప్రాంతంలో సాయుధ బలగాల ప్రత్యేక అధికారాల చట్టం(ఏఎఫ్ఎస్పీఏ) కొనసాగుతుందని స్పష్టం చేసింది. ఈ చట్టం ప్రకారం ముందస్తు వారెంటు లేకుండానే ఎవరినైనా అరెస్టు చేయవచ్చు.
కొన్ని దశాబ్దాలుగా నాగాలాండ్లో ఏఎఫ్ఎస్పీఏ కొనసాగుతోంది. తాజా ప్రకటనతో డిసెంబర్ 30 నుంచి మరో ఆరు నెలలపాటు ఈ చట్టం కొనసాగుతుందని కేంద్ర ప్రభుత్వం తెలిపింది. నాగాలాండ్లోని వివిధ ప్రాంతాల్లో హత్యలు, దోపిడీలు జరుగుతున్నందున కల్లోల ప్రాంతంగా కొనసాగించాలని నిర్ణయించినట్లు హోం మంత్రిత్వ శాఖ అధికారి ఒకరు చెప్పారు. అయితే ఏఎఫ్ఎస్పీఏను రద్దు చేయాలని నాగాలాండ్లోని వివిధ వేర్పాటువాద సంస్థలు పెద్ద ఎత్తున డిమాండ్ చేస్తున్నాయి.
2015 ఆగస్టులో ప్రధాన వేర్పాటువాద సంస్థ అయిన నేషనల్‌ సోషలిస్ట్‌ కౌన్సిల్‌ ఆఫ్‌ నాగాలాండ్ (ఎన్‌ఎస్‌సీఎన్‌- ఐఎమ్‌) వర్గంతో కేంద్ర ప్రభుత్వం ముసాయిదా ఒప్పందం కుదుర్చుకుంది. ఎన్‌ఎస్‌సీఎన్‌ (ఐఎమ్‌) వర్గం నాయకుడు మూవాతో కేంద్ర ప్రభుత్వ ప్రతినిధి, రాష్ట్ర గవర్నర్‌ ఎన్‌.రవి జరిపిన చర్చలు సానుకూల ఫలితాలనిచ్చాయి. చర్చల్లో కొరకరాని కొయ్యలాగా మారిన నాగా ప్రత్యేక జెండా, ప్రత్యేక రాజ్యాంగంపై ఓ అవగాహనకు వచ్చినట్లు తెలుస్తోంది.
ఇదీ చూడండి: 'నాగా'ల సమస్యకు పరిష్కారం దిశగా కేంద్రం!
