జమ్ముకశ్మీర్ క్రికెట్ అసోసియేషన్ ఆర్థిక లావాదేవీల అవకతవకల కేసులో ఆరోపణలు ఎదుర్కొంటున్న ఆ రాష్ట్ర మాజీ ముఖ్యమంత్రి ఫరూఖ్ అబ్దుల్లాను ప్రశ్నించింది ఎన్ఫోర్స్మెంట్ డైరెక్టరేట్(ఈడీ). కేసులో దర్యాప్తు ముమ్మరం చేసింది.
బుధవారం ఛండీగఢ్లోని ఈడీ కార్యాలయంలో హాజరయ్యారు అబ్దుల్లా. ఈ మేరకు ఆయనను ప్రశ్నించిన అధికారులు మనీ లాండరింగ్ నిరోధక చట్టం కింద వాంగ్మూలం నమోదు చేశారు.
ఇదీ కేసు...
2002-11 మధ్య జమ్ముకశ్మీర్లో క్రికెట్ అభివృద్ధికి బీసీసీఐ సుమారు రూ.43 కోట్లు మంజూరు చేసింది. ఈ నిధుల వినియోగంలో అవకతవకలు జరిగినట్లు ఆరోపిస్తూ గత ఏడాది జులైలో అబ్దుల్లాతో పాటు జేకేసీఏ ప్రధాన కార్యదర్శి మహమ్మద్ సలీమ్ ఖాన్, ఖజానా అధికారి అహ్సాన్ అహ్మద్ మిర్జా, జేకే బ్యాంక్ అధికారి బషిర్ అహ్మద్ మిస్గర్పై ఛార్జిషీట్ దాఖలు చేసింది కేంద్ర దర్యాప్తు సంస్థ (సీబీఐ). ఆ రాష్ట్ర హైకోర్టు ఆదేశాల మేరకు 2015 నుంచి ఈ కేసుపై దర్యాప్తు చేపట్టింది. సీబీఐ ఎఫ్ఐఆర్, ఛార్జిషీట్ ప్రకారం అక్రమ నగదు బదిలీ కేసు నమోదు చేసింది ఈడీ.
విచారణకు సిద్ధం...
క్రికెట్ అసోసియేషన్ ఆర్థిక లావాదేవీల అవకతవకల్లో తాను ఎలాంటి తప్పు చేయలేదని ఉద్ఘాటించారు నేషనల్ కాన్ఫరెన్స్ అధ్యక్షుడు, మాజీ ముఖ్యమంత్రి ఫరూఖ్ అబ్దుల్లా. విచారణ ఎదుర్కొనేందుకు సిద్ధంగా ఉన్నానని తెలిపారు. దేశంలోని న్యాయవ్యవస్థపై పూర్తి విశ్వాసముందని అన్నారు.
ఇదీ చూడండి: రేపు సుప్రీంకు అయోధ్య మధ్యవర్తిత్వ కమిటీ నివేదక
