భారత్- చైనాలు సరిహద్దు సమస్యలను ద్వైపాక్షిక ఒప్పందాల మేరకు శాంతియుతంగా పరిష్కరించుకునేందుకుగాను ఓ అంగీకారానికి వచ్చాయని భారత విదేశాంగశాఖ తెలిపింది. భారత్-చైనా మధ్య సైనిక చర్యలు స్నేహపూర్వక, శాంతియుత వాతావరణంలో జరిగాయని వెల్లడించింది. ద్వైపాక్షిక సంబంధాల బలోపేతానికి, సరిహద్దుల వెంట శాంతి నెలకొనడం అవసరమని విదేశాంగశాఖ స్పష్టం చేసింది.
తూర్పు లద్దాఖ్ సరిహద్దులో నెలరోజులుగా నెలకొన్న ఉద్రిక్తతల తగ్గింపే లక్ష్యంగా భారత్-చైనా సైనికాధికారులు శనివారం సమావేశమయ్యారు. వాస్తవాధీన రేఖ వెంబడి.. చైనాకు చెందిన చుషుల్ సెక్టార్లోని మాల్డోలో ఈ సమావేశం జరిగింది. భారత్ తరఫున లేహ్‌లోని 14 కార్ప్స్‌ విభాగానికి చెందిన లెఫ్టినెంట్ జనరల్ హరిందర్ సింగ్, చైనా తరఫున టిబెట్‌ సైనిక జిల్లా కమాండర్‌ లూ లెన్‌ ఈ చర్చల్లో పాల్గొన్నారు. సరిహద్దుల్లో నెలకొన్న ఉద్రిక్తతల నివారణకు లెఫ్టినెంట్ల స్థాయిలో చర్చలు జరగటం ఇదే మొదటిసారి.
దౌత్య సంబంధాలకు 70 ఏళ్లు
"ఈ ఏడాదితో భారత్ చైనాల మధ్య దౌత్య సంబంధాలు ఏర్పడి 70 ఏళ్లు అయ్యాయి. ఇరుదేశాల మధ్య ఇప్పటి వరకు కుదిరిన ద్వైపాక్షిక ఒప్పందాలను పరస్పరం గౌరవిస్తూనే... ఇరుదేశాల బంధం మరింత అభివృద్ధి చెందాలని భారత్, చైనా ఆకాంక్షిస్తున్నాయి."
- భారత విదేశాంగశాఖ
సరిహద్దుల్లో శాంతిని నెలకొల్పడం కోసం ఇరుపక్షాలు సైనిక, దౌత్యపరమైన చర్యలు కొనసాగిస్తాయని భారత విదేశాంగశాఖ స్పష్టం చేసింది.
ఇదీ చూడండి: కిక్కిరిసిన అమెరికా రోడ్లు- శాంతియుతంగా నిరసనలు
