మార్చి 25న లాక్డౌన్ విధించే సమయానికి 3.4 రోజులుగా ఉండేది కరోనా కేసుల రెట్టింపు వ్యవధి. తాజాగా ఈ సమయం 17.4 రోజులకు పెరిగిందని కేంద్ర వైద్య ఆరోగ్య శాఖ వెల్లడించింది. రోజుకు సగటున 10 వేల కేసులు నమోదవుతున్నా కరోనా కేసుల రెట్టింపు సమయం పెరగడం గమనార్హం.
అన్ని రాష్ట్రాల ప్రధాన కార్యదర్శులు, ఆరోగ్య, పట్టణ కార్యదర్శులతో కేబినెట్ సెక్రటరీ వీడియో సమావేశం నిర్వహించారు. కేసులు విపరీతంగా పెరుగుతున్న కారణంగా కరోనా వ్యాప్తికి కేంద్ర బిందువులైన ప్రాంతాలపై ప్రత్యేక శ్రద్ధ పెట్టాలన్నారు.
కంటైన్మెంట్ జోన్లు, పరీక్షలు, ఆరోగ్య కేంద్రాల మౌలిక సదుపాయాలు సహా సిబ్బంది వినియోగంపై దృష్టి సారించాలని కేబినెట్ సెక్రటరీ రాష్ట్రాలకు సూచించారు.
మరిన్ని సూచనలు
⦁ కంటైన్మెంట్ జోన్లలో ప్రతి ఇంటిపై పర్యవేక్షణ ఉంచాలి.
⦁ వీలైనంత త్వరగా కరోనా కేసులను గుర్తించాలి.
⦁ బహిరంగ ప్రదేశాల్లో మాస్కుల వినియోగం, భౌతిక దూరం పాటించేలా చూడాలి.
పెరిగిన రికవరీ రేటు...
దేశంలో వైరస్ నుంచి కోలుకున్న వారి శాతం (రికవరీ రేటు) క్రమంగా పెరుగుతుందని ఆరోగ్య శాఖ స్పష్టం చేసింది. ప్రస్తుతం రికవరీ రేటు 49.47గా ఉంది.
దేశవ్యాప్తంగా పరీక్షల సామర్థ్యం పెంచినట్లు భారత వైద్య పరిశోధన మండలి (ఐసీఎమ్ఆర్) తెలిపింది. మొత్తం 877 ప్రయోగశాలల్లో (637 ప్రభత్వ, 240 ప్రైవేట్) కరోనా పరీక్షలు నిర్వహిస్తున్నట్లు స్పష్టం చేసింది.
ఇదీ చూడండి: రాత్రి వేళ కర్ఫ్యూ అమలుపై కేంద్రం క్లారిటీ
