కేంద్రంపై మరోసారి విమర్శలు గుప్పించారు కాంగ్రెస్ అగ్రనేత రాహుల్ గాంధీ. బిహార్ రైతుల ఆదాయంతో దేశంలోని అన్నదాతల ఆదాయాన్ని సమానం చేయాలని మోదీ సర్కారు యత్నిస్తోందని ఆరోపించారు. దేశంలో పంజాబ్ రైతులు అత్యధిక ఆదాయం పొందుతుండగా.. బిహార్ రైతులు అత్యల్ప ఆదాయం సంపాదిస్తున్నారన్న ఓ మీడియా నివేదికను రాహుల్ ఉటంకించారు.
"దేశంలోని రైతులందరూ పంజాబ్ రైతుల ఆదాయంతో సమానమైన సంపదను పొందాలని భావిస్తున్నారు. అయితే మోదీ ప్రభుత్వం అందుకు భిన్నంగా రైతుల ఆదాయాన్ని బిహార్ రైతుల ఆదాయంతో సమానం చేయలని చూస్తోంది" అని హిందీలో ట్వీట్ చేశారు రాహుల్.
'దేశంలో రైతుల సగటు వార్షిక ఆదాయం రూ.77,124. పంజాబ్ రైతులు వార్షిక ఆదాయం రూ.2,16,708(అత్యధికం). బిహార్ రైతుల సంపాదన రూ.42,684 మాత్రమే'నన్న ఓ సర్వేను ప్రస్తావించారు రాహుల్.
'రైతుల సహనాన్ని పరీక్షించవద్దు'
'కర్షకుల సహనాన్ని పరీక్షించవద్దు' అంటూ కేంద్రాన్ని హెచ్చరించారు ఎన్సీపీ అధినేత శరద్ పవార్. పరిస్థితులు చూస్తుంటే రైతుల దీక్ష మరికొన్ని రోజులు సాగేలా ఉందని అభిప్రాయపడ్డారు. సకాలంలో నిర్ణయం తీసుకోకపోతే.. రైతుల నిరసనలు దేశవ్యాప్తంగా విస్తరించవచ్చని వ్యాఖ్యానించారు. 'సాగు చట్టాలను ఉపసంహరించుకోవాలని రైతులు ఉద్ధృతంగా ఆందోళన చేస్తున్నారు. వాటిని వెంటనే వెనక్కి తీసుకోవాలి' అని శరద్ కేంద్రాన్ని కోరారు.
వ్యవసాయ బిల్లులపై చర్చ జరపాలని అప్పట్లో విపక్షాలు కోరినప్పటికీ ప్రభుత్వం అలా చేయకుండా హడావుడిగా ఆమోదింపచేసుకుందని ఆరోపించారు పవార్.
ఇదీ చూడండి: నల్లకుబేరులకు జీవితఖైదుపై వ్యాజ్యం కొట్టివేత
