సాధారణంగా కుక్క కరిస్తే ఆసుపత్రికి వెళ్లి వైద్యుడికి చూపిస్తాం. ఛత్తీస్గఢ్లోని బలోద్ ప్రాంత ప్రజలు మాత్రం ఓ ఆలయానికి వెళ్తారు. అక్కడ ఉన్న శునక ప్రతిమకు పూజలు చేస్తారు. ఇలా చేస్తే వైద్యుల అవసరమే లేకుండా నయమవుతుందని స్థానికుల విశ్వాసం. అదే 'కుకుర్' శునకాలయం.
అవును.. మీరు విన్నది నిజమే. ఈ ఆలయంలో దేవుడితో సమానంగా శునకాన్ని పూజిస్తారు. అసలు దీని వెనుక కథ ఏంటంటే..?
"ఛత్తీస్గఢ్లోని బలోద్ ప్రాంతంలో ఓ గిరిజనుడికి 'కుకుర్' అనే శునకం ఉండేది. ఒకసారి చేసిన అప్పు కట్టలేక ఆ శునకాన్ని వడ్డీ వ్యాపారికి ఇచ్చేశాడు. కొద్దికాలం అనంతరం ఆ వ్యాపారి ఇంట్లో చోరీ జరిగింది.
దొంగలను గుర్తించిన శునకం చోరీకి గురైన సొమ్మును పట్టించింది. ఇందుకు కృతజ్ఞతగా ఆ గిరిజనుడు చేసిన అప్పు మొత్తాన్ని మాఫీ చేస్తున్నట్లు ఓ లేఖ రాశాడట ఆ వ్యాపారి. ఈ లేఖను కుక్క మెడకు కట్టి పంపించాడు. ఈ విషయమేమీ తెలియని గిరిజనుడు.. శునకం మళ్లీ తన దగ్గరకు వచ్చిందని.. కర్రతో విచక్షణారహితంగా కొట్టడం వల్ల అది చనిపోయింది.
తర్వాత కుక్క మెడకు ఉన్న లేఖ తీసి చదివిన ఆ వ్యక్తి జరిగిన సంగతి తెలుసుకుని తీవ్ర మనస్తాపానికి గురయ్యాడు. శునకం జ్ఞాపకాలతో కుంగిపోయి ఓ ప్రతిమను చేయించాడు. దగ్గర్లోని ఆలయంలో ప్రతిష్ఠించాడు. ఈ స్థలానికి కుకుర్ సమాధిగా నామకరణం చేశాడు."- స్థానికులు చెప్పే కథ
ఈ ఆలయంలో నందితో సమానంగా ఈ కుకుర్ ప్రతిమకు పూజలు చేస్తారు. ఎవరినైనా కుక్క కరిస్తే ఈ ప్రతిమ దగ్గర నైవేద్యం పెట్టి.. దీపారాధన చేసి పూజలు చేస్తారు భక్తులు. అలా చేస్తే వైద్య చికిత్స తీసుకోనవసరం లేదని స్థానికులు నమ్ముతున్నారు.
ఇదీ చూడండి: బ్యాంకులు కొల్లగొట్టి.. బాక్సాఫీస్ నిర్మాతగా..!
