డిసెంబర్ 5న జరగాల్సిన కర్ణాటక ఉపఎన్నికలు వాయిదా వేయాలని కోరుతూ అనర్హత వేటుపడిన 17 మంది కర్ణాటక ఎమ్మెల్యేలు సుప్రీంకోర్టును ఆశ్రయించారు. వీరి తరఫున ప్రముఖ న్యాయవాది ముకుల్ రోహిత్గీ వాదనలు వినిపించారు. అయితే ఈ విషయంలో ఎమ్మెల్యేలు తాజాగా దరఖాస్తు చేసుకోవాలని ధర్మాసనం సూచించింది.
స్పీకర్ తమపై అనర్హత వేటు వేయడానికి వ్యతిరేకంగా 17 మంది ఎమ్మెల్యేలు అక్టోబర్ 25న సుప్రీంకోర్టులో పిటిషన్ దాఖలు చేశారు. వాదనలు విన్న జస్టిస్ ఎన్వీ రమణ నేతృత్వంలోని ధర్మాసనం తీర్పును రిజర్వ్ చేసింది.
ఎమ్మెల్యేలపై అనర్హత వేటుపడి ఖాళీ అయిన స్థానాలకు డిసెంబర్ 5న ఉపఎన్నికలు నిర్వహించాలని ఎన్నికల సంఘం నిర్ణయించింది. నవంబర్ 11 నుంచి 18 వరకు నామినేషన్ల సమర్పణకు గడువిచ్చింది. నిజానికి అక్టోబర్ 21నే ఉపఎన్నికలు జరగాల్సి ఉంది. అయితే అనర్హతకు గురైన ఎమ్మెల్యేల పిటిషన్లు పెండింగ్లో ఉన్నందున ఈ ఎన్నికలను డిసెంబర్ 5కు వాయిదా వేసింది ఈసీ.
పోటీ చేసే అవకాశం లేక..
సుప్రీం కోర్టు ఇంకా తీర్పు ఇవ్వనందున అనర్హత వేటుకు గురైన ఎమ్మెల్యేలు ఈ ఎన్నికల్లో పోటీచేసే అవకాశం లేకుండా పోయింది. ఈ నేపథ్యంలో ఉప ఎన్నికలు వాయిదా వేయాలని వీరు తాజాగా సుప్రీంను ఆశ్రయించారు.
కూలిన కుమారస్వామి ప్రభుత్వం
17 మంది అసమ్మతి ఎమ్మెల్యేల వల్ల కుమారస్వామి నేతృత్వంలోని సంకీర్ణ ప్రభుత్వం కుప్పకూలింది. అనంతరం.. అప్పటి స్పీకర్ రమేశ్కుమార్ ఈ అసమ్మతి ఎమ్మెల్యేలపై అనర్హత వేటు వేశారు.
ఇదీ చూడండి: అడ్వాణీ నివాసానికి వెళ్లి ప్రధాని మోదీ శుభాకాంక్షలు
