కరోనా వ్యాప్తిలో రెండో గరిష్ఠ స్థాయినీ అధిగమించామని ప్రకటించారు దిల్లీ ముఖ్యమంత్రి అరవింద్ కేజ్రీవాల్. సెప్టెంబర్ మూడో వారంలో పాజిటివ్ కేసుల సంఖ్య అమాంతం పెరగగా.... ప్రస్తుతం ఆలాంటి పరిస్థితి లేదని స్పష్టంచేశారు.
"సెప్టెంబర్లో కొవిడ్ కేసుల గరిష్ఠ స్థాయిని దాటాం. ప్రస్తుతం పాజిటివ్ కేసుల సంఖ్య తగ్గుముఖం పట్టింది. వైరస్ నియంత్రణకు పెద్ద ఎత్తున పరీక్షలు నిర్వహిస్తున్నాం. పది వేలకు పైగా పడకలు ఖాళీగా ఉన్నాయి. "
- అరవింద్ కేజ్రీవాల్, దిల్లీ ముఖ్యమంత్రి
ఏంటీ రెండో గరిష్ఠ స్థాయి?
కొద్ది నెలల క్రితం దిల్లీలో కరోనా తీవ్ర స్థాయిలో విజృంభించింది. తర్వాత క్రమంగా తగ్గాయి. అయితే ఆగస్టు 17 నుంచి వైరస్ మళ్లీ విజృంభించడం ప్రారంభించింది. సెప్టెంబర్ 17న ఒక్క రోజే ఏకంగా 4,473 కేసులు నమోదయ్యాయి. తర్వాత రోజు నుంచి కేసుల సంఖ్య మళ్లీ క్రమంగా తగ్గడం మొదలైంది.
సోమవారం దిల్లీలో నిర్వహించిన పరీక్షల్లో 1,947 కొత్త కేసులను అధికారులు గుర్తించారు. మొత్తం కేసుల సంఖ్య 2 లక్షల 92 వేల 560కి చేరింది. మరో 32 మంది మృతి చెందగా మరణాల సంఖ్య 5 వేల 542కు పెరిగింది. పాజిటివ్ రేటు 8.82 గా ఉండగా.. మరణాల రేటు 1.41గా ఉంది.
కరోనా వ్యాప్తిలో రెండో గరిష్ఠస్థాయినీ అధిగమించామని ప్రకటించిన తొలి రాష్ట్రం దిల్లీనే కావడం గమనార్హం.
ఇదీ చూడండి: దేశంలో కరోనా తగ్గుముఖం.. కొత్తగా 61 వేల కేసులు
