ఎక్సైజ్ సుంకం పరిమితి పెంపుపై కాంగ్రెస్ తీవ్రస్థాయిలో విరుచుకుపడింది. అంతర్జాతీయంగా పడిపోతున్న చమురు ధరల ప్రయోజనాలను వాహనదారులకు అందకుండా కేంద్ర ప్రభుత్వం చట్ట సవరణ చేయడం సిగ్గుచేటని ఆ పార్టీ సీనియర్ నేత రణ్దీప్ సుర్జేవాలా ధ్వజమెత్తారు. జీవనోపాధి కోల్పోయి ప్రజలు ఇబ్బందులు పడుతుంటే కేంద్రం అమానవీయంగా వ్యవహరిస్తోందని ట్వీట్ చేశారు.
"ప్రియమైన ప్రధాని, ఈ పద్ధతిలో ప్రజల కష్టాలను సద్వినియోగం చేసుకోవడం సిగ్గుచేటు, అమానవీయం. ప్రజలు జీవనోపాధి, ఉద్యోగాలు కోల్పోతున్నారు. చమురు ధరలు పతనమవుతుంటే ఎక్సైజ్ సుంకం పెంచి భాజపా ప్రభుత్వం ప్రయోజనం పొందాలని చూస్తోంది. ప్రజలను అంచుకు నెట్టవద్దు"
-సుర్జేవాలా ట్వీట్
భవిష్యత్తులో పెట్రోలు, డీజిల్‌పై లీటరుకు 8 రూపాయల వరకు ఎక్సైజ్ సుంకం పెంచుకొనేలా కేంద్ర ప్రభుత్వం ప్రస్తుతం ఉన్న చట్టాన్ని సవరించింది. ఆర్థిక బిల్లు-2020కి సవరణలు కోరుతూ కేంద్ర ఆర్థిక మంత్రి నిర్మలా సీతారామన్‌ లోక్‌సభలో ప్రవేశపెట్టిన బిల్లు ఎలాంటి చర్చ లేకుండానే ఆమోదం పొందింది. ఫలితంగా పెట్రోలు, డీజిల్‌పై ప్రస్తుతం ఉన్న పరిమితిపై అదనంగా 8 రూపాయల వరకు ప్రత్యేక ఎక్సైజ్ సుంకాన్ని పెంచుకొనే అధికారం కేంద్రానికి లభించనుంది.
