ఇటీవల కేంద్రం ఆమోదించిన వ్యవసాయ చట్టాలపై రైతుల్లో నెలకొన్న భయాలను తొలగించడానికి ఆ రంగంతో సంబంధం ఉన్న నిపుణులు, పారిశ్రామిక వేత్తలు, విద్యావేత్తలతో భేటి అయ్యారు రక్షణ మంత్రి రాజ్నాథ్ సింగ్. గ్లోబల్ ఫూడ్ అండ్ రిటైల్ కౌన్సిల్ ఛైర్మన్ రాకేశ్ గంభీర్ సహా పలువురు ప్రముఖులు ఈ భేటీకి హాజరయ్యారు.
"ఈ మూడు వ్యవసాయ చట్టాలతో.. వ్యవసాయ రంగంలో కొత్త శకం ఆరంభమవుతుంది. రైతులకు దళారీల పీడ వదులుతుంది. రైతులు తమ ఉత్పత్తులకు ఎక్కువ ధర పొందే అవకాశం కలుగుతుంది."
- రాకేశ్ గంభీర్,
గ్లోబల్ ఫూడ్ అండ్ రిటైల్ కౌన్సిల్ ఛైర్మన్
వారికి అర్థమయ్యే భాషలోనే...
'నూతన వ్యవసాయ చట్టాలతో రైతులకు అపారమైన ప్రయోజనాలు కలుగుతాయి. అయితే వారికి వీటిపై అవగాహన కల్పించాలి. రైతులకు అర్థమయ్యే భాషలో చెప్పాలి. అప్పుడే వారిలో ఉండే అపోహలు తొలగిపోతాయి' అని పంజాబ్కు చెందిన గ్రీన్ వ్యాలీ ఫార్మ్స్ ఛైర్మన్ ఆర్పీఎస్ గాంధీ పేర్కొన్నారు. ఇండియన్ ఛాంబర్ ఆఫ్ ఫూడ్ అండ్ అగ్రికల్చర్ ఛైర్మన్ ఎంజే ఖాన్ ఇదే విషయాన్ని ఉద్ఘాటించారు.
ఈ విషయంపై ఇప్పటికే పలుమార్లు కేంద్ర వ్యవసాయశాఖ మంత్రి నరేంద్ర సింగ్ తోమర్తో కలిసి రైతులు, ఇతర ప్రతినిధులతో సమావేశం అయ్యారు రక్షణ మంత్రి.
