కరోనా టీకా అందుబాటులోకి వచ్చేనాటికి వ్యాక్సిన్ పంపిణీ, ప్రజలకు టీకాలు వేయడంలో ఎటువంటి ఇబ్బందులు రాకుండా ఉండేందుకు ప్రణాళిక సిద్ధం చేస్తోంది కేంద్రం. ఈ క్రమంలో టీకా వేయడానికి కావాల్సిన వైద్య సిబ్బందిని సిద్ధం చేయాలని రాష్ట్రాలకు సూచించింది. ఈ మేరకు నవంబరు 23న రాష్ట్రాలకు లేఖ రాసినట్లు తెలిపారు కేంద్ర ఆరోగ్య మంత్రిత్వ శాఖ అదనపు కార్యదర్శి వందన గుర్నాని.
టీకాలు, ఇంజక్షన్లు సమర్థంగా వేయడంలో అనుభవం ఉన్న ఎంబీబీఎస్ వైద్యులు, బీడీఎస్ పట్టభద్రులు, స్టాఫ్ నర్సులు, సహాయక నర్సులు సహా ఫార్మసిస్టులను పరిగణనలోకి తీసుకోవాలని లేఖలో పేర్కొంది కేంద్ర ఆరోగ్య శాఖ. డిమాండ్ను బట్టి మాజీ వైద్యులు, నర్సులు, సహా ఫార్మసిస్టుల సేవలను వినియోగించుకోవచ్చని పేర్కొంది. టీకా వేయడంలో వారికి తగిన శిక్షణ ఇవ్వాలని సూచించింది.
కోటి మందికి పైగా..
ఒకవేళ కరోనా వ్యాక్సిన్ అందుబాటులోకి వస్తే ప్రత్యేక డ్రైవ్లు నిర్వహించి.. టీకా ఇవ్వడానికి వైద్యులు, ఎంబీబీఎస్ విద్యార్థులు, నర్సులు, ఆశా వర్కర్లు సహా సుమారు కోటి మంది వైద్య సిబ్బంది సిద్ధంగా ఉన్నట్లు అధికార వర్గాలు తెలిపాయి. వీరితోపాటు మరో 3 లక్షల మంది వైద్య సిబ్బంది సిద్ధంగా ఉన్నట్లు భారతీయ వైద్య సంఘం(ఐఎంఏ) పేర్కొంది.
ఇదీ చూడండి: 'ఆగస్టు నాటికి 30 కోట్ల మందికి టీకా'
