శివసేన అధినేత ఉద్ధవ్ ఠాక్రే తనయుడు, యువసేన అధినేత ఆదిత్య ఠాక్రే ఇవాళ మహారాష్ట్ర వర్లీ నియోజకవర్గంలో నామినేషన్ దాఖలు చేశారు. తనకు 16.05 కోట్ల విలువైన ఆస్తులు ఉన్నాయని ప్రకటించారు. ఠాక్రే కుటుంబం నుంచి ఎన్నికల్లో పోటీ చేయడం చరిత్రలో ఇదే మొదటిసారి.
29 ఏళ్ల ఆదిత్య దాఖలు చేసిన అఫిడవిట్లో రూ.4.67 కోట్ల విలువైన స్థిరాస్తులు, రూ.11.38 కోట్ల చరాస్తులు ఉన్నట్లు పేర్కొన్నారు. వీటిలో రూ.10.36 కోట్ల బ్యాంకు డిపాజిట్లు, రూ.6.50 లక్షలు విలువ చేసే బీఎమ్డబ్ల్యూ కారు ఉన్నాయని తెలిపారు. తనకు రూ. 64.65 లక్షల విలువైన ఆభరణాలు, ఇతర వస్తువులు ఉన్నాయని తెలిపారు.
శివసేన యువజన విభాగం అధినేత అయిన ఆదిత్య అఫిడవిట్లో... 2011లో బ్యాచిలర్ ఆఫ్ ఆర్ట్స్, 2015లో 'లా' పూర్తి చేసినట్లు స్పష్టం చేశారు. తనపై ఎలాంటి క్రిమినల్ కేసులు లేవని వెల్లడించారు.
భాజపా, ఎన్సీపీ అభ్యర్థులు కూడా...
భాజపా మహారాష్ట్ర విభాగ అధ్యక్షుడు చంద్రకాంత్ పాటిల్, ఎన్సీపీ అభ్యర్థి ధనంజయ్ ముండే కూడా ఇవాళ నామినేషన్లు దాఖలు చేశారు. పాటిల్.. పుణెలోని కొత్రుద్ నియోజకవర్గం నుంచి బరిలోకి దిగుతున్నారు. ఎన్సీపీ అభ్యర్థి ధనంజయ్ ముండే పార్లీ సెగ్మెంట్లో నామినేషన్ దాఖలు చేశారు. దేశ్ముఖ్ సోదరులు... అమిత్ దేశ్ముఖ్(కాంగ్రెస్) లాతూర్(పట్టణం)లో, ధీరజ్ దేశ్ముఖ్ లాతూర్(గ్రామీణం)లో నామినేషన్లు వేశారు. వీరికి మద్దతుగా తమ సోదరుడు, బాలీవుడ్ నటుడు రితీశ్దేశ్ముఖ్ హాజరయ్యారు.
మహారాష్ట్ర అసెంబ్లీ ఎన్నికల్లో పోటీకి నామినేషన్ దాఖలు చేసేందుకు శుక్రవారమే చివరి రోజు. అక్టోబర్ 21న అసెంబ్లీ ఎన్నికలు జరగనున్నాయి.
ఇదీ చూడండి: ఆ నగరంలో ట్రాఫిక్ జామ్ అయితే ఆనందమే!
