ఝార్ఖండ్ అసెంబ్లీ తుదివిడత ఎన్నికల ప్రచారం ముగిసింది. చివరిదైన ఐదో విడతలో భాగంగా 16 నియోజకవర్గాలకు ఈ నెల 20న ఎన్నికలు జరగనున్నాయి. ఓటింగ్ను సజావుగా నిర్వహించేందుకు 6 జిల్లాల్లో 40,000 భద్రతా సిబ్బందిని ఏర్పాటు చేసినట్లు ఎన్నికల కమిషన్ అధికారులు తెలిపారు.
20న ఉదయం 7 గంటల నుంచి సాయంత్రం 5 గంటల వరకు ఓటింగ్ నిర్వహించనున్నారు. భద్రత కారణాల దృష్ట్యా బోరియో, బర్హైత్, లితిపారా, మహేశ్పుర్, సికారిపారా నియోజకవర్గాల్లో సాయంత్రం 3 గంటలకే పోలింగ్ ముగియనున్నట్లు అధికారులు తెలిపారు.
పోటీలో ప్రముఖులు
ఐదో విడతలో ఆ రాష్ట్రానికి చెందిన ఇద్దరు మంత్రులతో పాటు, మాజీ ముఖ్యమంత్రి హేమంత్ సోరెన్ భవితవ్యాన్ని ఓటర్లు తేల్చనున్నారు. మొత్తం రెండు నియోజకవర్గాల నుంచి బరిలో దిగారు సోరెన్. అయితే డుంకా నియోజకవర్గంలో ఆ రాష్ట్ర మహిళ, శిశు సంక్షేమ శాఖ మంత్రి, లూయిస్ మరండి(భాజపా) నుంచి గట్టి పోటీ ఎదుర్కొంటున్నారు. సరథ్ నుంచి ఆ రాష్ట్ర వ్యవసాయ మంత్రి రాంధిర్ సింగ్ పోటీలో ఉన్నారు.
పోటాపోటీ ప్రచారం
భాజపా తరపున స్వయంగా ప్రధానమంత్రి నరేంద్రమోదీ ప్రచారాన్ని ముందుండి నడిపించారు. కేంద్ర హోంమంత్రి అమిత్ షా, రక్షణ మంత్రి రాజ్నాథ్ సింగ్, పార్టీ కార్యనిర్వాహక అధ్యక్షుడు జేపీ నడ్డా అభ్యర్థుల తరపున ప్రచారాలు నిర్వహించారు.
మరోవైపు కాంగ్రెస్ నుంచి ప్రియాంక గాంధీ, ఛత్తీస్గఢ్ ముఖ్యమంత్రి భూపేష్ బఘేల్, శతృఘ్న సిన్హా ఎన్నికల ప్రచారంలో పాల్గొన్నారు.
నక్సల్స్ ప్రభావిత రాష్ట్రమైన ఝార్ఖండ్లో 81 అసెంబ్లీ స్థానాలున్నాయి. ఐదు విడతలుగా ఎన్నికలు జరుగుతున్నాయి. నవంబర్ 30 నుంచి డిసెంబర్ 16 మధ్య జరిగిన నాలుగు విడతల్లో 65 నియోజకవర్గాలకు పోలింగ్ ముగిసింది. డిసెంబర్ 23న ఫలితాలు వెలువడనున్నాయి.
ఇదీ చదవండి: డిసెంబర్ 28న కాంగ్రెస్ దేశవ్యాప్త ర్యాలీలు
