రెండోసారి అధికారంలోకి వచ్చిన మోదీ ప్రభుత్వం.. తొలి మంత్రివర్గ సమావేశంలో కీలక నిర్ణయాలు తీసుకుంది. రైతులపై వరాల జల్లు కురించటమే కాకుండా దేశంలోని రిటైల్ వ్యాపారులు, దుకాణదారులు, స్వయం ఉపాధి పొందేవారి కోసం కొత్త పథకాన్ని ప్రకటించింది. ఎన్నికల ప్రచార హామీల్లో భాగంగా 60 ఏళ్లు నిండిన రిటైల్ వ్యాపారులు, చిల్లర దుకాణదారులకు నెలకు కనీసం రూ. 3 వేలు పింఛన్ అందేలా కొత్త పథకానికి మంత్రివర్గం ఆమోదం తెలిపింది.
ఈ పథకంతో దేశంలోని సుమారు 3 కోట్ల మంది లబ్ధి పొందనున్నారు.
" ఒక కొత్త నిర్ణయం తీసుకున్నాం. చిన్న దుకాణదారులు, రిటైల్ వ్యాపారులు, చిన్న చిన్న వస్తువులు అమ్ముకునే వారి కోసం కొత్త పింఛన్ పథకాన్ని ప్రారంభించాం. మూడేళ్లలో 5 కోట్ల మందిని ఈ పథకంలో చేర్పించాలని లక్ష్యంగా పెట్టుకున్నాం. కామన్ సర్వీస్ కేంద్రాల ద్వారా ఈ పథకం కోసం పేర్లను నమోదు చేసుకోవాలి. దీనికి ఒక నియమం ఉంది. 18 ఏళ్ల వారు నమోదు చేసుకుంటే రోజుకు రెండు రూపాయలు(నెలకు రూ.60) చెల్లించాలి. 29 ఏళ్లప్పుడు నమోదు చేసుకుంటే నెలకి రూ.వంద, 40 ఏళ్ల వారు నెలకి రూ. 2 వందలు చెల్లించాల్సి ఉంటుంది. చిన్న దుకాణదారులు ఎంతైతే చెల్లిస్తారో దానికి సమాన మొత్తాన్ని ప్రభుత్వం కూడా చెల్లిస్తుంది. ఇలాంటి పింఛన్ పథకం ప్రపంచంలోనే ఎక్కడా లేదు. "
-ప్రకాశ్ జావడేకర్, సమాచార, ప్రసారాల శాఖ మంత్రి
అర్హులెవరు..?
జీఎస్టీ టర్నోవర్ రూ.1.5కోట్ల లోపు ఉండి 18 నుంచి 40 ఏళ్ల లోపు వయసు వారిని ఈ పథకానికి దరఖాస్తు చేసుకునేందుకు అర్హులుగా నిర్ణయించారు. దేశవ్యాప్తంగా విస్తరించిన ఉన్న 3.25 లక్షల కామన్ సర్వీస్ సెంటర్లలో ఎక్కడైనా పేర్లను నమోదు చేసుకునేందుకు వీలు కల్పించారు.
