మహారాష్ట్రలో డ్యామ్​కు గండి.. 11 మంది మృతి

ఆదివారం నుంచి కురుస్తున్న భారీ వర్షాలతో మహారాష్ట్రలోని తివారే డ్యామ్​కు గండి పడింది. ఈ ప్రమాదంలో ఇప్పటివరకు 11 మంది మృతి చెందారు. గల్లంతయిన మరో 20 మంది కోసం గాలింపు చర్యలు సాగిస్తున్నారు అధికారులు.

మహారాష్ట్ర వ్యాప్తంగా కురుస్తున్న భారీ వర్షాలతో జలాశయాలకు ముప్పు ఏర్పడుతోంది. రత్నగిరి జిల్లా తివారే గ్రామంలోని డ్యామ్​కు అర్ధరాత్రి గండి పడటం వల్ల 11 మంది ప్రాణాలు కోల్పోయారు. మరో 20 మంది గల్లంతయ్యారు. డ్యామ్​ నుంచి ఒక్కసారిగా ఉద్ధృతంగా ప్రవహించిన వరదకు 12 నుంచి 15 ఇళ్లు కొట్టుకుపోయాయి. 11 మంది మృతదేహాలను స్వాధీనం చేసుకున్న అధికారులు మిగతావారి కోసం గాలింపు చర్యలు సాగిస్తున్నారు.

నీటిపారుదల శాఖ అధికారుల నిర్లక్ష్యంతోనే ప్రమాదం జరిగిందని స్థానికులు ఆగ్రహం వ్యక్తం చేస్తున్నారు.