బంగాల్లో భాజపా లేవనెత్తిన 'జై శ్రీరామ్' సెగ కొనసాగుతోంది. కాషాయ దళం కార్యకర్తలు జై శ్రీరామ్ నినాదాన్ని వినియోగించటంపై తీవ్రంగా స్పందించారు ఆ రాష్ట్ర ముఖ్యమంత్రి మమతా బెనర్జీ. జై శ్రీరామ్ నినాదంతో మతాన్ని భాజపా రాజకీయంలోకి లాగుతోందని మండిపడ్డారు దీదీ.
జై శ్రీరామ్, జై రామ్ జీ కీ, రామ్ నామ్ సత్య హై వంటి నినాదాలు మతపరమైనవని పేర్కొన్నారు దీదీ. వాటిని తాము గౌరవిస్తామన్నారు. కానీ జై శ్రీరామ్ను పార్టీ నినాదంగా భాజపా ఉపయోగిస్తోందని ఆరోపిస్తూ తన ఫేస్బుక్ పోస్ట్లో రాసుకొచ్చారు మమత. మతపరమైన అంశాలను రాజకీయ ప్రయోజనాల కోసం వినియోగిస్తున్నారని విమర్శించారు.
రాజకీయ ర్యాలీలు, పార్టీల కార్యక్రమాల్లో ప్రత్యేక నినాదాలు వినియోగిస్తే తమకు ఎలాంటి ఇబ్బంది లేదని పేర్కొన్నారు. ఇతరులపై దౌర్జన్యంగా రాజకీయ నినాదాలను అమలు చేయాలనుకునే వారిని తాము గౌరవించమని తెలిపారు. ద్వేషపూరిత భావజాలాన్ని ప్రచారం చేయాలనుకునే ప్రయత్నాలను వ్యతిరేకించాలని పిలుపునిచ్చారు దీదీ.
ఇటీవల రాష్ట్ర పర్యటనలో భాగంగా దీదీ వాహనం వెళుతున్న సమయంలో కొందరు జై శ్రీరామ్ అంటూ నినాదాలు చేశారు. ఇలాంటి ఘటనలు రెండు చోట్ల ఎదురవటం వల్ల నినాదాలు చేసిన వారిపై దీదీ ఆగ్రహం వ్యక్తం చేశారు.
'రామ నామం స్మరించండి'
రామ నామం తలుచుకోమని దీదీకి సూచించారు దిల్లీ భాజపా నేత ప్రవీణ్ శంకర్ కపూర్. అలా చేస్తే మనసులో ఉన్న చెడు ఆలోచనలు తొలగిపోతాయన్నారు. ఈ మేరకు 'భగవాన్ శ్రీ రామ్ నామ్ మంత్రా' పుస్తకాన్ని బహుమతిగా ఇస్తున్నట్టు లేఖ రాశారు. ఇటీవల బంగాల్లోని పర్గనాస్ జిల్లాలో జైశ్రీరామ్ నినాదాలు చేసిన వారిపై మమతా బెనర్జీ ఆగ్రహం వ్యక్తం చేయటాన్ని ఆయన తప్పుపట్టారు .
ఇదీ చూడండి: 'దీదీకి 10 వేల జై శ్రీరామ్ పోస్టుకార్డులు'
