మహారాష్ట్రలో రసవత్తర రాజకీయ పోరుకు పార్టీలన్నీ వ్యూహాలు రచిస్తున్నాయి. ఈ ఎన్నికలను ప్రతిష్టాత్మకంగా తీసుకొని అభ్యర్థులను బరిలోకి దింపుతున్నాయి. నామినేషన్లకు చివరిరోజైన ఇవాళ.. అధికార భాజపా ఏడుగురు అభ్యర్థులతో కూడిన నాలుగో జాబితాను విడుదల చేసింది. పార్టీ సీనియర్ నేత ఏక్నాథ్ ఖడ్సే, కేబినెట్ మంత్రి వినోద్ తావడేలకు నిరాశే ఎదురైంది.
ఏక్నాథ్ ఖాడ్సే బదులుగా ఆయన కుమార్తె రోహిణీకి ఉత్తర మహారాష్ట్రలోని ముక్తాయీనగర్ టికెట్ ఇచ్చింది కమలదళం. 1991 నుంచి ఈ స్థానానికి ప్రాతినిధ్యం వహిస్తున్నారు ఏక్నాథ్.
విద్యుత్శాఖ మంత్రి చంద్రశేఖర్ బావన్కులే సహా ఇతర సీనియర్ నేతలు ప్రకాశ్ మెహ్తా, రాజ్ పురోహిత్కూ ఈ జాబితాలో చోటు దక్కలేదు. విద్యాశాఖ మంత్రి తావడే బదులుగా బోరివలీ స్థానంలో ఈసారి సునీల్ రాణేను బరిలోకి దింపింది.
దక్షిణ ముంబయిలోని కోలాబా సిట్టింగ్ ఎమ్మెల్యే పురోహిత్ కంటే.. మహారాష్ట్ర శాసన మండలి ఛైర్మన్ రామ్రాజే నింబాల్కర్ అల్లుడు రాహుల్ నవ్రేకర్వైపే మొగ్గుచూపింది అధిష్ఠానం. మాజీ ఎన్సీపీ ఎమ్మెల్సీ నవ్రేకర్ ఇటీవలే భాజపాలో చేరి తాజాగా టికెట్ దక్కించుకోవడం విశేషం.
అవినీతి ఆరోపణలే కారణం...
మహారాష్ట్ర భాజపాలోని సీనియర్ నాయకులలో అత్యంత రాజకీయ అనుభవమున్న ఖడ్సేపై అవినీతి ఆరోపణలతో ఆయనను పక్కనబెట్టింది పార్టీ. 2016లో మంత్రి పదవి నుంచి తప్పించింది. మరోసారి టికెట్ ఇవ్వమని పార్టీ ఇదివరకే స్పష్టం చేసిన నేపథ్యంలో ఆయన ఈ వారమే స్వతంత్ర అభ్యర్థిగా నామినేషన్ దాఖలు చేశారు.
288 స్థానాలున్న మహారాష్ట్ర అసెంబ్లీకి ఇప్పటివరకు భాజపా 150 చోట్ల అభ్యర్థులను ప్రకటించింది. శివసేన 100 మందికిపైగా ఏబీ నామినేషన్ ఫారాలు అందించింది.
అయితే... నేడు నామినేషన్ చివరిరోజుకాగా ఈ కూటమి సీట్ల పంపకంపై ఇంకా స్పష్టత లేదు. అక్టోబర్ 5న నామినేషన్లను పరిశీలించనున్నారు. నామినేషన్ల ఉపసంహరణకు అక్టోబర్ 7న చివరితేదీ. అక్టోబర్ 21న ఎన్నికలు నిర్వహించి, 24న ఫలితాలు ప్రకటించనున్నారు.
ఇదీ చూడండి: 'మహా'సంగ్రామం: భాజపా జైత్రయాత్ర కొనసాగేనా..?
